Орал қаласында ел Тәуелсіздігінің 30 жылдығына арналған «AQJAIYQ MARATHON – 2021» күзгі жартылай марафоны өтті. 3,10,5,21,1 шақырымға жарысқан спортшылар арасында БҚО әкімі Ғ.Есқалиев, БҚО әкімінің орынбасарлары Б.Нарымбетов, А.Алпысбаев және Орал қаласының әкімі А.Шыныбеков болды.
Бұқаралық спортты дамыту және салауатты өмір салтын насихаттау мақсатында оздырылған бәсекеге 1000-нан астам желаяқ қатысты. Аталған жарыста Бәйтерек ауданының спортшылары да бой көрсетті. Соңғы жылдардағы облыс жеңіл атлеттерінің үздігі саналатын Жарас Айтуаров бастап барған аудан спортшылары әдеттегідей үздіктер қатарында болды.
«Бәйтерек» спорт клубының басшысы Максим Үмбетқалиевтің айтуынша, «AQJAIYQ MARATHON – 2021» сайысына аудан атынан Жарас Айтуаров, Виктория Глотова, Наталья Панова, Ақкенже Таубаева, Дамира Ерсайынова, Ляззат Төлепбергенова, Ақылбек Қабдолмәжит. Марина Гальярд және Артем Гардинар сынды спортшылар қатысқан.
Жарыс қорытындысында Ақкенже Таубаева үшінші орын иеленсе, 10 шақырым қашықтықта алдына жан салмаған жас спортшы Наталья Панова облыстың абсолютті чемпионы атағына қол жеткізді. Одан бөлек Виктория Глотова да 3 шақырым қашықтықта облыстың абсолютті чемпионы атанса, команда жетекшісі, белгілі бапкер Жарас Айтуаров та облыста өзіне тең келер жеңіл атлеттің жоқ екенін көрсетіп, абсолютті чемпион атағына қол жеткізді.
Сондай-ақ 10 шақырым қашықтыққа жүгірген Дамира Ерсайынова мен Марина Гальярд, 21,1 шақырымды бағындырған Ляззат Төлепбергенова, 3 шақырымды жүгіріп өткен Артем Гардинар мен Ақылбек Қабдолмәжит те жақсы нәтиже көрсеткен.
-Жарыс аудан командасы үшін сәтті өтті. Спортшыларымыз жеңімпаз атанды. Жүлдегер де бар. Жалпы биылғы маусым өзім және шәкірттерім үшін сәтті болды дей аламын. Бірнеше жарысқа шығып, жүллде салдық. Чемпион атаған кездеріміз де болды. Туған ауылымызда марафон өткіздік. Мақсатымыз ел намысын халықаралық ареналарда сәтті қорғайтын спортшыларды шығару. Сол жолда тынымсыз еңбектенетін боламыз,-дейді бапкер Жарас Айтуаров.
Жарыс соңында «AQJAIYQ MARATHON 2021» бәсекесіне қатысқан барлық спортшыларға спорттық шара үшін арнайы жасалған футболкалар мен мәре сызығын кескен спортшыларға медальдар табысталды. Ал жеңімпаздар мен жүлдегерлерге ақшалай сыйлықтар берілді.
Түгелбай Бисен,
Бәйтерек ауданы
zhaikpress.kz
