Сырым ауданындағы А. Шайхиев атындағы балалар мен жасөспірімдер спорт мектебінің оқушысы Амирлан Мұратов қазақ күресінен Қазақстан Республикасының чемпионы атанды.
Астана қаласындағы Beeline Arena спорт кешенінде қазақ күресінен балалар арасындағы алғашқы Қазақстан Республикасы чемпионатында ол 29 келі салмақ дәрежесінде күресіп, өзінің спорттық мансабындағы ірі жеңіске қол жеткізді.
- Қазақ күресінен чемпионат ересектер арасында өтіп жүр. Балалар арасында болып тұрғаны бірінші рет. Амирланға жеңіс оңай, кездейсоқ келген жоқ. Біз оған сендік. Жарыс алдында балғын балуандарға оқу-жаттығу жиындарын, әлемдік бозкілемдерде күресіп жүрген ағаларымен шеберлік сағаттарын өткіздік. Амирлан болса тер төкті, еңбектенді. Ақжайық күресінің тарихы Амирланмен жалғасуда, - дейді БҚО Қазақ күресі Ассосациясының Президенті Әсет Сұлтанұлы.
Иә, он жасында республика чемпионы атану - Амирланның өзі тұрмақ, Батыс Қазақстан өңірі үшін де жарқын оқиға. Айта кетейік, Амирланға күрес әліппесін үйреткен бапкері - Мәулет Қожахметов.
Амирланның әкесі Арман Гумаров та - бозкілемнің өз адамы. “Әке көрген оқ жонар” - дегендей, кішкене күнінен күрес күртесімен құндақталып, медальдар сыңғырын құлағына құйып өскен бала бүгін ту көтеруге жарап қалды.
- Бапкерлер босамай, асығыстық қылмай ақылмен күрес деді. Финалдағы қарсыласымның қарым - қабілетін жоғары бағалаймын. Қазақстан Республикасының чемпионы болғаныма тоқмейілсімеймін. Мені әлі талай биіктер күтіп тұр. Мақсатым - Олимпиада чемпионы атану. - деді Амирлан QazSport арнасына берген сұхбатында. Арманыңа жет, Арманның ұлы!
Бауыржан Ширмединұлы,
Сырым ауданы
