Таяуда тағайындалған аудан әкімі Алпамыс Көшкінбаев ауыл-аймақтың тыныс-тіршілігімен танысып, жергілікті тұрғындармен жүздесу мақсатындағы сапарын қаймағы бұзылмаған Бірлік ауылдық округінен бастады.
Алдымен қаржы тапшылығына байланысты қолбайлау болған бірнеше жылдан күрделі жөндеуді қажет ететін М.Мирманов атындағы жалпы орта білім беретін білім ордасына ат басын бұрып, содан соң балабақшаның жұмысымен танысты.
Аудан басшысы бұл орайда күрделі жөндеуге байланысты жобалық-сметалық құжаттаманың дайын тұрғанын, қаражат бөлінсе жүзеге асатынын тілге тиек етті. Содан соң ауданның атқа мінер азаматтарымен бірге «Әсем нан» наубайханасының ашылу салтанатына қатысып, тұрғындардың қуанышымен бөлісті.
Сөз кезегінде Алпамыс Жаңабайұлы:
- Халықтың әл ауқатын арттыратын мемлекеттік бағдарламаларды тиімді пайдалана білген азаматтарға әрқашан қолдау білдіретінін айта кетті. Жаңа бизнесті бастау және дамыту үшін 2022 жылы қайтарымсыз негізде берілетін грантқа қол жеткізген кәсіп иесі Әсемгүл Бисекенова 2022 жылы жергілікті тұрғындарды нан өнімдерімен қамтамасыз ету мақсатында осы кәсібін жеке үй-жайда бастаған сәтінің куәсі болған едік. Бүгінгі күні тұтынушылардың сұранысы артып, тынымсыз еңбектің арқасында кәсібінің ауқымы кеңейіп, арнайы орында тұрғындарды қамтамасыз етеді, - деді.
Содан кейін ауыл тұрғыны, жас кәсіпкер Нұрсапа Жантеміровтің ауласына бет бұрды.
Өткен жылы қайтарымсыз грант алып, жылыжайда көкөніс өнімдерін өсіруді қолға алған кәсіпкердің жұмыс барысымен танысты. Елді мекенде мемлекеттік бағдарламаға қол жеткізген кәсіпкерлер саны артуда. Бұл қуанарлық жағдай. «Бірлік мал зауыты» ЖШС директоры Қанат Ешімов кездесу барысында түйіні тарқамаған мәселелерін, өтініштерін ортаға салды.
Сапар барысы ауылдық мәдениет үйінде тұрғындарды жеке қабылдауымен жалғасын тапты. Қабылдауда жұмыссыздық, жер, су жөніндегі бірқатар өтініштер аудан басшысының назарына ұсынылды. Айтылған ұсыныстар мен өтініштерді шама келгенше шешу үшін жүйелі түрде жұмыстанатынын жеткізді.
Аудан әкімінің жұртшылықпен кездесіп, елді мекендерге сапары желілік кестеге сай жалғасады.
Зара Жәрдемова,
Жаңақала ауданы
zhaikpress.kz
