Бәйтерек ауданы Янайкин ауылындағы Талғат Бигелдинов атындағы орта мектепте дене тәрбиесі мен спорт өте жақсы дамыған. Білім ұясында 12 үйірме болса, солардың дені спорт секциялары. Спортты жанына серік еткен оқушылар ауданды айтпағанда, облыстық, республикалық сайыстарда топ жарып жүр.
Таяуда аталмыш білім ұясында жаңа оқу жылы басталған тұста түрлі жарыстарда жеңімпаз болған және жүлдегер атанған оқушыларды марапаттау кеші болды. Онда 8-сынып оқушысы Мая Үмбеталиева мен 7-сынып оқушысы Снежанна Буштер сынды шәкірттер спорттық бағдарлау бойынша түрлі қашықтықта облыстық, республикалық сайыстарда бас жүлде және жүлделі орындар алғаны үшін түрлі марапатқа ие болды. Олардың ішінде қыркүйек айында өткен ел кубогы додасында ұзақ қашықтықты 16 жастағы қыздар арасында бірінші болып бағындырғаны үшін Мая Үмбеталиеваға берілген ҚР Мәдениет және спорт министрлігінің Дене шынықтыру және спорт комитетінің диплом да бар.
–Бала кезімізден спортқа жақын болдық. Өскен соң спорт саласында еңбек еттім. Дені сау, шымыр да сергек жанның тұлға болып қалыптасуына, алдына қойған мақсатына жетуіне мүмкіндігі мол және қоғамда да тигізер пайдасы зор болары анық. Сол себепті балалық шақтан бастап спортты серік етіп, салауатты өмір салтын ұстануды маңызы зор. Өзім қызмет кеткен, жетекшілік жасаған мектептің барлығында біліммен қатар өнер мен спортты дамытуды басты назарда ұстаймын. Аталмыш пәндердің мұғалімдерімен жиі кездесіп, қандай түйткілдер барын сұрап, біліп отырамын. Оқушыларды да, мұғалімдерді де осы бағыттардағы түрлі сайыстардан қалдырмауға тырысамын. Соның нәтижесі болар, шәкірттеріміз түрлі жарыстардан олжалы оралуда. Оқушыларымыздың біразында 50-ден аса медаль бар. Мәселен, дойбыдан жасөспірімдер арасында 12 мәрте ел чемпионы, 5 рет Азия чемпионатының күміс жүлдегері атанған Айша Залмұхан деген оқушымызды мақтан тұтамыз. Ерасыл Серік деген оқушымыз спорттық бағдарлау бойынша республикалық сайыста 6 мәрте жеңімпаз атанды. Жалпы 15-ке жуық оқушымыз республикалық жарыстардың чемпиондары болып табылады, – дейді аталмыш мектептің директоры Жасталап Сабиров.
Альбина Бәтенова,
Бәйтерек ауданы
zhaikpress.kz
