Жақында Орал қаласында шаңғымен спорттық бағдарлаудан жарыс өтті. Аталмыш бәсекеде бой көрсеткен Бәйтерек ауданының құрамасы командалық есепте жүлделі екінші орынға ие болды.
Бәсі биік бәсекеге өңірдің түкпір-түкпірінен түрлі жас мөлшері мен түрлі деңгейдегі жас спортшылар келген. Чемпионатта аудан намысын жас туристер станциясы үйірмесінің оқушылары қорғады. Оларға Н. Касимов, С. Бекешев пен Е.Сабитов сынды өз ісінің шеберлері жетекшілік етті.
Жас спортшылар келген жарыс тартысқа толы болды. Байқау соңына дейін кімнің бабы, кімнің бағы шабатыны белгісіз еді.
Дегенмен, сан жарыста бақ сынап, шыңдала түскен аудан спортшылары бұл бәсекеде жеңіс тұғырынан көріне білді. Соның ішінде «Биатлонды бағдарлау» қашықтығы бойынша сынға түскен: Наиль Стабаев 1-орын, Қанатқызы Айлана, Серікқали Ернұр мен Мусалимов Данат 2-орынды иеленсе, Нұржігіт және Жансерік Гиссатдиндер 3-орынды қанжығаларына байлады.
Шын үздіктерді сарапқа салған «Спринт» қашықтығында Нұржігіт Гиссатдин, Данат Мусалимов, Алина Лемешева, Бахтияр Болатбек, Жансерік Гиссатдин секілді спортшылар үздік үштіктен көрінсе, Айлана Қанатқызы және Ернұр Серікқали екіншіге жайғасып, шашасына шаң жұқтырмаған Наиль Стабаев бұл аталымның да жеңімпазы атанды.
Назерке Сыйлыбай,
Бәйтерек ауданы
zhaikpress.kz
