Бәйтерек ауданында соңғы жылдары мемлекеттік тұрғын үй қорынан баспана алуға үміткерлер саны артып келеді. Қазіргі таңда тұрғын үйге кезекте 808 адам тұр. Олардың 181-і жетім өскендер, 173-і көпбалалы отбасылар, 298-і халықтың әлеуметтік осал тобына жататындар, 132-сі мемлекеттік және бюджеттік сала қызметкерлері және 24-і тұрғын үйі «апатты» деп танылғандар.
Бұл туралы сыбайлас жемқоллыққа қарсы күрес жөніндегі аудандық комиссия отырысында айтылды. Аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Аслан Даубаевтың баяндауынша, 2023 жылы республикалық бюджеттен берілетін трансферттер есебінен 22 ауылдан халықтың әлеуметтік осал топтары үшін 281 957,0 мың теңгеге 39 тұрғын баспана сатып алынды.
- Былтыр Шалғай, Егіндібұлақ, Красноармейск, Құрманғазы, Чиров, Сұлукөл, Раздольное және Кирсанов секілді шекаралас ауылдарда қажетті коммуникациялармен, сантехникамен жабдықталған 54 тұрғын үй салынды. Сондай-ақ, Янайкин ауылында халықтың әлеуметтік осал топтары үшін 3 тұрғын үй сатып алынды. Ауданымызда 2025-2027 жылдарға арналған «Қаладан ауылға» жобасын іске асырыла басталды.
Осы жоба аясында Шалғай, Егіндібұлақ, Красноармейск, Чиров, Раздольное ауылдық елді мекендеріне 30 отбасын көшіру жоспарлануда. Аталған елді мекендерде фельдшерлік-акушерлік пункт, жалпы білім беретін мектеп, мектеп балабақшасы, мәдени-демалыс орныдары бар. «Қаладан ауылға» бағдарламасының жүзеге асуының нәтижесінде ауданымыздағы тұрғындар санының өсуі күтілуде,-деді Аслан Асқарұлы.
Комиссия отырысында жастар арасында сыбайлас жемқорлыққа қарсы мәдениетті қалыптастыру, жемқорлық тәуекелдерін, олардың пайда болуына ықпал ететін себептер мен жағдайларды анықтау және азайту бойынша баяндалды. Сондай-ақ бюджет қаражатын игеру, сыбайлас жемқорлық тәуекелдерін болдырмау мақсатында атқарылған жұмыстар да сөз болды.
Серік Маратұлы
Бәйтерек ауданы
