Бүгін, яғни 8 желтоқсанда №2 бірмандаттық аумақтық сайлау округі бойынша Бәйтерек ауданы мәслихатының шығып қалған депутатының орнына сайлау өтуде.
Аталған сайлау округінде орналасқан №157, 162, 163, 165 сайлау учаскелері таңғы сағат 6:00-де ашылды. Әнұран орындалған соң, сағат 7.00-де дауыс беру рәсімі басталды. Сайлау округі бойынша 3261 сайлаушы тіркелген.
Переметный ауылдық округіне қарасты Калинин ауылындағы №157 сайлау учаскесіне келіп, алғашқы болып таңдауын жасаған жергілікті тұрғын Бәтима Хасанованың айтуынша, бұл да - өзіндік маңызы бар сайлау. Сол себепті оған бейжай қарамау керек. Өз ауданына, ауылына жаны ашитын жандар бүгін жергілікті жердегі сайлау учаскелеріне барып, дауыс бергендері дұрыс.
Аталмыш сайлау учаскесінің төрағасы Юрий Саяпиннің айтуынша, Калининде 1369 тұрғынның дауыс беру құқығы бар. 11 адамнан үйден дауыс беру жөнінде өтініш түскен.
Ал Зеленный ауылында орналасқан №162 сайлау учаскесі бойынша дауыс беретін 946 адамның сағат 10-00-ге дейін 70-і (7,4 пайыз) келіп, өз таңдауларын жасап кетті. Олардың ішінде отбасы мүшелері, еңбек ардагерлері, бюджеттік сала және ауылдағы «У Настены» дүкенінің қызметкерлері бар. №162 сайлау учаскесінің төрағасы Мерхат Есенғалиевтің сөзіне қарағанда, тұрғындардың көңіл-күйлері жақсы, олар осынау сайлаудың мән-маңызын түсіп дауыстарын беріп жатыр. Түрлі себептермен сайлау уческесіне келе алмайтын 23 адам сағат 12-ден соң үйлерде дауыс бермекші.
Айта кетейік, аудандық мәслихат депутаттығына үш кандидат бағын сынауда.
Бақыт Болат
Бәйтерек ауданы
