Бәйтерек ауданы, Дариян ауылдық округі кітапханаларының ұйымдастыруымен «Сырғалым» қыз-келіншектер клубының аясында «Көреген ене, ибалы келін» атты тағылымды кездесу өтті.
Бұл іс-шара ұрпақтар сабақтастығын насихаттау, ене мен келін арасындағы сыйластық пен тәрбиенің маңызын көрсету, сондай-ақ қыз балаларға болашақтағы келін ретіндегі рөлін түсіндіру мақсат тұтты.
Онда кітапханашылар «Сырғалым» клубының мақсаттары мен міндеттерімен таныстырып, оның қыз-келіншектерге рухани, мәдени, адамгершілік тұрғыда бағыт-бағдар беретін алаң екенін атап өтті. Кездесуге арнайы шақырылған қонақтары – ауылдың қадірлі тұрғыны, көпке үлгі абзал ана Слушаш Мендібайқызы және оның ибалы келіні Данагүл Маратқызы Ишмұхамбетовтер болды.
Кездесу сұхбат және сұрақ-жауап форматында өтіп, жиналғандар ене мен келіннің қарым-қатынасы, отбасындағы тәрбие және ұлттық дәстүр туралы өмірлік тәжірибелерімен бөлісті. Кеш соңында «Қазақтың келіндері-ай» әні шырқалды.
Динара Ғизатова,
Бәйтерек ауданы
