Атырау қаласында «Best stars 2021» атты республикалық би конкурсы өтті. Ел ішіндегі үздік би ұжымдарын анықтап, жастардың хореография өнеріне деген қызығушылығын арттыру және би өнерін ел ішінде кеңінен насихаттау мақсатында оздырылған өнер бәйгесіне еліміздің әр аймағынан келген үздік бишілер қатысты.
Аталмыш сайыста өңір намысын Бәйтерек ауданы Үлкен Шаған ауылдық клубы жанынан құрылған үлгілі «НұрАй» би ансамблі қорғады. Гүлмира Алкановадан тәлім алатын аудан бишілері конкурсқа үш би дайындады. Қорытындысында би ансамблінің үлкен тобы «Express» би композициясымен бірінші орын иеленсе, дәл осы топтың орындауындағы «Ғасырлар тоғысы» биі өнер додасының бас жүлдесін жеңіп алды. Сонымен қатар би ансамблінің орта тобындағы бишілері де намысты қолдан бермеді. Бәйгеге «Freestyle» биін ұсынған «НұрАй» би ансамблінің орта топ мүшелері де республикалық конкурстың бірінші орынды қанжығасына басты.
Сонымен өнерпаздар қатар аталмыш конкурстың Грузия елінде өтетін кезеңіне арнайы сертификат жеңіп алды.
Биылғы жыл үлкен шағандық бишілер үшін сәтті болды. Бұған дейін Бөкей Ордасы ауданында өткен «Билеген биім-еліме сыйым» атты конкурста екінші, республикалық «Ақ шағала» хореографиялық фестиваль-байқауында да сәтті өнер өнер көрсетіп, үздіктер қатарында болды. Одан бөлек облыстық және аудандық бацқаулардың алдын бермей келді. жыл соңына дейін аудан бишілері үш конкурс және бір облыстық фестивалде өнер көрсетуді жоспарлап отырғанын да жетекшісі атап өтті.
-Атырау қаласында өткен конкурс жоғары деңгейде ұйымдастырылған. Еліміздің үздік би ұжымдарымен бақ сынасу оңайға түспеді. Десе де үздік атандық. Бүгінгі жеңіс үлкен еңбектің, жылдар бойығы тынымсыз жаттығулардың арқасында келді. Шағын ғана ауылдан шығып, осындай биікке жетуге қолдау білдірген ауылдың атымтай азаматтары мен биші қыздарымның ата-аналарына және тынбай еңбек еткен шәкірттеріме алғыс айтамын. Бұл жетістік бізді екі есе жаттығып, үлкен сахналарда өнер көрсетуге жетелейді,-дейді «НұрАй» би ансамблінің жетекшісі Гүлмира Алканова.
Түгелбай Бисен,
Бәйтерек ауданы
zhaikpress.kz
