Хамза Есенжанов атындағы балалар мен жасөспірімдер кітапханасы дәстүрлі түрде ұйымдастыратын «Оқырман отбасы» облыстық байқауы мәреге жетті. Қазақтың халық ауыз әдебиетін, салт-дәстүрін жаңғырту, қазақ әдебиетімен қоса әлем классикасының алтын қорындағы құнды шығармаларды оқыту, балалардың ана тіліне сүйіспеншілігін арттыра түсіп, туған жеріне деген патриоттық сезімін ояту мақсатында өтетін байқаудың бәсі биік.
Еліміздегі жағдайға байланысты биыл аталмыш байқау онлайн түрде өткізіліп, оған өңіріміздің сегіз ауданының оқырмандары қатысты. Таныстыру және қазақы салт-дәстүрмен байланысқан ертегіні сахналау сияқты екі кезеңнен тұрған байқау қорытындысында Бәйтерек ауданының атынан қатысқан Меңдіғазиевтер отбасы II орынды иеленді.
Жуырда облыстық байқаудан жүлде иеленген отбасыға арнайы барған аудандық орталықтандырылған кітапханалар жүйесінің директоры Жеңісгүл Жаңабаева жанұя мүшелерін жеңісімен құттықтап, оларға аудандық мәдениет, тілдерді дамыту, дене шынықтыру және спорт бөлімінің басшысы Р.Ихласовтың және облыстық Х.Есенжанов атындағы балалар және жасөспірімдер кітапханасының директоры З.Утешованың алғысхаттарын табыс етті.
– «Отбасы күні» мерекесі қарсаңында елге үлгілі жанұяны құттықтап оларға алғысымызды жеткізуді жөн көрдік. Бұл отбасы әлі талай сайыстарда жеңіс тұрғырынан көрінеді деген сенімдемін, – деді отбасы мүшелерін құттықтаған Жеңісгүл Қалиқызы.
Меңдіғазиевтер отбасы кітапханаішілік байқаулардың белсенді қатысушылары, көптеген сайыстардан жүлделі орындар алып жүрген үлгілі жанұя.
Аружан Аманжол,
Бәйтерек ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
