Ақын, ардагер журналист, жерлесіміз Ғайсағали Сейтақ, «Жайық пресс» медиахолдингі бас директорының орынбасары Нұрлыбек Рахманов бастап, аудандық үнжария редакторы Ұлпан Жакина қостаған БАҚ өкілдері аудан жұртшылығымен кездесті.
Алдымен журналисттеріміз М-С Бабажанов атындағы мектепте боп, ұстаздар қауымымен жүздесті.
– Елдегі зиялы қауымның өкілі саналатын ұстаздар қауымына кеп, газет-журналға жазылуға үндеу артық болар. Мұғалім тек белгілі бір пәннің маманы ғана емес, елдің ертеңін тәрбиелейтін тәлімгер. Елжанды ұрпақтың қалыптасуына бірден бір жауапты да осы сіздерсіз. Атақты түлғалардың есімдерін иеленген мектептер әдетте тұлғатану мақсатында жұмыстанады. Осылайша, тарихты түгендейді. М-С. Бабажанов та өз бағасын ала алмай келе жатқан тұлға. Еңбегі толық зерттелмеген, тарихи тұрғыдан бағасын алмаған, өлімінің өзі жұмбақ қайраткер. Шоқаннан бұрын Ресей патшалығының экспедиция қауымдастығының мүшелігіне өткен. Қарауылқожаның, үстем таптың өкілі болған соң жөнді дәріптелмей келе жатқан қайраткер. Шекарамызды шегендеп, ұланғайыр даланы енші қалдырған еңбегінің өзі ерлікке пара-пар емес пе? Осы тақырыпты тереңнен қацзап, оқушыларыңызды қызықтыра білсеңіз, өлкетану ғана емес қазақ тарихына қосқан ерен еңбегіңіз болар еді, - деп Ғайсақаң ұстаздар қауымына ой салады.
Дәл осындай кездесулер кейін «Ер Төстік» бөбекжайы мен аудандық ауруханада жалғасын тапты.
Облыс орталығынан келген қонақтарды аудан әкімінің орынбасары Кенесары Нұршинов қабылдады.
БАҚ өкілдері аудандық мекеме қызметкерлерімен кездесті. Жай ғана кездесіп қана қоймай, әлеуметтік желіге қойылатын талаптар, парақшаны жүргізуде жіберілетін ортақ қателіктер туралы шеберлік сағатын да өткізді.
– Әлеуметтік желі — қарым-қатынас жасау құралы ғана емес, атқарылған жұмыстарды жариялау, есеп берудің, тіпті имидж қалыптастырудың, уақыт үнемдеудің құралы, - деген Нұрлыбек Рахманов қатысушылар тарапынан қойылған сауалдарға жауап берді.
