«Болар адам — бала шағынан» дейді дана халқымыз. Талантты балаларымызды өз көрермендерімен жақын таныстырып, табыстыратын бірден-бір орта, ол — сахна.
Тасқала аудандық мәдени-демалыс орталығының ұйымдастыруымен «Балалар жылы» мен «Өнерлі өркен» жобасы аясында аудандық «Балдәурен» балалар шығармашылығы байқауы өткізілді. Байқаудың мақсаты балалардың шығармашылыққа деген талпынысын арттыру, олардың дамуына қолдау көрсету, дәстүрлі өнерді дәріптеп, би өнерінің кең ауқымда өрбуіне атсалысу, өскелең ұрпаққа рухани байлығымызды дәріптеу, балалардың эстетикалық талғамын қалыптастыру, ізгілік пен адамгершілікке баулу болып табылады.
Өнерпаздар эстрадалық вокал /вокалдық топ, дуэт, трио, квартет/, хорография, халықтық музыка /домбыра/ жанрлары бойынша өнер көрсетті.
Алпысқа жуық өнерлі өрен қатысқан байқаудың нәтижесінде облыстық кезеңде эстрадалық вокал жанры бойынша ақтаулық Саян Сарым мен Инсар Мерекеұлы, халықтық музыка домбыра жанры бойынша аудандық балалар саз мектебінің шәкірті Рахман Қошекен алдағы уақытта облыстық байқауда ауданымыздың намысын қорғайтын болады.
Бинұр Хабидашева,
Тасқала ауданы
