Барыс жылы - бәйтеректіктер үшін өте тамаша жыл болды. Әсіресе ауыл шаруашалығы, соның ішінде өсімдік шаруашылығы саласында тер төгіп жүрген жандардың еңбегі жанды. Аудандық мәдениет үйінде өткен жылды қорытындылауға арналған мерекелік іс-шара кезінде осы жайттар кеңінен сөз болды.
- Егер бұрындары «70-ші, 95-ші жылдары керемет өнім болды» деп айтса, енді биылғы берекетке қарап «2022 жыл мол өнім алынды» деп айтылатыны анық. Егін түсімінің көптігі сондай, оны сақтайтын орын таба алмай қиналдық. Әлеуметтік, білім, медицина салаларын да жетістіктеріміз аз емес. Біздің жіті назар аударып отырғанымыз – жол мәселесі. Осынау түйіткілді шешу арқылы біз тұрғындардың өмір сапасын арттыруға жағдай жасаймыз. Яғни тұрғындар күн райына қарамастан жоспарлаған жерлеріне баруы керек. Біздің мақсатымыз – ауылдық округтың бәріне де қатқыл табанды жол жеткізу. Ал шағын ауылдардың жолына қиыршық тасты қоспа (ЩГС) төсеу жоспарда бар. Сөйтіп ауыл тұрғындарының қалаға немесе басқа жаққа көшпеуіне жағдай жасауымыз қажет. Шекаралық елді мекендер бос қалмауы тиіс. Осы бағыттағы біздің ұсынысымызды қабыл алып, жол мәселесін шешуге жәрдемін берген ауданымыздың кәсіпкерлеріне айтар алғысымыз зор. Бейнелеп айтқанда, бір үйдің баласындай, бір қолдың саласындай бірігіп еңбек ететін болсақ, ауданымызды гүлдендіру бағытындағы еңбегіміз еш кетпесі анық, - деді аудан әкімі Марат Тоқжанов.
Іс-шара барысында аудан әкімінің 2022 жылғы 13 желтоқсанындағы ұсынысы негізінде аудандық мәслихат шешімімен «Бәйтерек ауданының құрметі азаматы» атағын алғандарға құрмет көрсетілді.
Бұл атаққа ие болғандардың ішінде Асылбек Сұлтанғали, Виктор Железнов, Адам Имашев, Александр Журавлев, Жігер Менешев, Қайыржан Киргенев бар. Ал ҚР ауыл шаруашылығы қызметкерлерінің салалық кәсіподағының ІІ дәрежелі «Еңбек даңқы» төсбелгісін аудан әкімінің орынбасары Мұрат Бәйменов, аудандық ауыл шаруашылығы және кәсіпкерлік бөлімінің сектор меңгерушісі Серікқали Ищанов алды. Дәл осы кәсіподақтың «Елеулі еңбегі үшін» медалімен «Жәрдем» шаруа қожылығының басшысы Серікқали Әжиев, «Ayla Enviro» ЖШС директоры Байзолла Аманғалиев, «Малкин» шаруа қожалығының жетекшісі Владимир Малкин, «Жеңіс» ЖК басшысы Төлеген Еркештаев марапатталды. ҚР Кәсіподақтар федерациясының «Еңбек озаты» медалін аудандық мәслихат депутаты Есен Сүндетов, Дариян ауылдық ауруханасының директоры Ғабитжан Ислямов, Щапов ауылдық округінің әкімі Біржан Нұрбайыров өңіріне тақты. «Білім және ғылым қызметкерлерінің кәсіподағына сіңірген еңбегі үшін» медалі Переметный орта мектебінің директоры Мәлік Өтешевке, Б.Момышұлы атындағы орта мектептің мұғалімі Елена Петровсковаға, Мичурин орта мектебінің директоры Алмагүл Кенжебаеваға, Қ.Қайсенов атындағы орта мектептің директоры Гүлмира Жиеналиеваға, сала ардагері Салтанат Танабаеваға бұйырды. Қазақстандық салалық мәдениет, спорт, туризм және ақпарат қызметкерлерінің кәсіптік одағының «Еңбек даңқы» төсбелгісіне Янайкин ауылдық кітапханасының кітапханашысы Татьяна Жила, Белес ауылдық клубының басшысы Ақтоты Имағамбетова, Махамбет ауылдық клубының басшысы Ағила Абрахманова, Трекин ауылдық клубының басшысы Анна Сидорова лайық деп танылды. Аудандық мәдени-демалыс орталығы басшысының орынбасары Юрий Саяпин мен Үлкен Шаған ауылдық клубының басшысы Базаргүл Малахова БҚО-ның «Үздік мәдениет қызметкері» төсбелгісіне қолжеткізді. ҚР Мәдениет және спорт министрілігінің Алғыс хаты аудандық мәдениет үйінің сүйемелдеушісі Тоғат Мұхамбетовке берілді. «АМАNАТ» партиясының ең жоғарғы наградасы «Белсенді қызметі үшін» төсбелгісін аудан әкімі Марат Тоқжанов, БҚО әкімі мен маслихат хатшысының Құрмет грамотасын аудандық ТҮКШЖКАЖ бөлімінің бас маманы Назгүл Абдулхаликова, ҚР Орталық сайлау комиссиясы төрағасының Алғыс хатын аудандық сайлау комиссиясының төрағасы Радик Ихласов алды.
Мерекелік іс-шара жергілікті өнерпаздардың концертіне ұласты.
Сәкен Әбілхалықов,
Бәйтерек ауданы,
zhaikpress.kz
