Бүгін облыс орталығы Оралда облыстық қоғамдық даму басқармасы және облыстық ардагерлер кеңесінің ұйымдастыруымен қазыналы қариялардың басын қосқан «Бата дарып, бақ қонсын» атты облыстық бата беру байқауы өтті.
Қадыр Мырза Әлі атындағы облыстық мәдениет және өнер орталығында өткен байқауға Казталов ауданынан Болашақ ауылдық округіне қарасты Жаңатаң ауылының абыз ақсақалы Есмағұл Мусин қатысты. Бұрыннан аузы дуалы Есмағұл атамыз байқауға қатысқан қазыналы қариялардың бәрін шаң қаптырып, бас жүлдені жеңіп алды.
Жас ұрпаққа баталы сөздің қадірін ұғындырып, батагөй қарттарды құрметтеуге, тіл тазалығы мен ұлт құндылығын насихаттауға арналған байқауда аудан намысын қорғаған Есмағұл қария шешендігін, сөз тапқырлығын және бата берудегі шеберлігін ұштастырып, Казталов ауданында жастарға тәлім берер қарттардың әлі де бар екенін дәлелдеп берді.
Нұр Рахман,
Казталов ауданы
zhaikpress.kz
