Жаңақала аудандық мәдени демалыс орталығына қарасты Қызылоба ауылдық мәдениет үйінде Кеңес Одағының батыры Есен Орақбаевтың туғанына 100 жыл толуына орай «Ер есімі – ел есінде» аудандық патриоттық әндер байқауы мен «Ерлікке тағзым» атты ақындар мүшәйрасы өтті.
Концерттің мақсаты – патриоттық әндердің орындалу мәнерін үйрету, кейінгі өсіп келе жатқан жас буынның туған еліне деген сүйіспеншілігін арттыру, ел тарихы мен мәдениетіне құрметпен қарау. Шара аудан әкімінің қолдауымен, мәдениет тілдерді дамыту, дене шынықтыру және спорт бөлімінің ұйымдастыруымен өтті.
Концертке Есен Орақбаевтың ұлы Есенгелді Орақбаев, келіні Райса Байғалиева, қызы Гүлнар Орақбаева және мәдениет, тілдерді дамыту, дене шынықтыру және спорт бөлімінің басшысы Данял Танзенов қатысты. Қызылоба ауылының әкімі Аманжол Жұмағазиев пен Гүлнар Орақбаева сөз алып, қатысушыларға сәттілік тіледі.
Ербол Серікбай «Отан ана» әнімен дүйім жұртты сүйсіндірсе, Алтынгүл Жұмажан «Ауылым» әнін нақышына келтіре шырқады. Махамбет Нұрахметов «Туған жер» әнімен халықтың ықыласына бөленсе, Ақеділ Ғұбашев «Ерлікке тағзым» атты өз туындысын оқыды. Анита Қанатова «Алтын бесік» әнімен дүйім жұртты тәнті етсе, Іңкәр Ибатуллина «Анаңның қадірін біл» әнін айтты. Әлібек Сүлейменов «Туған жер» әнін шырқаса, Базаркүл Батрашева Есен Шегрейұлына арналған туындысын оқыды. Жанболат Мұсағалиев «Қарызбын саған туған ел» әнін орындаса, Нұрдәулет Табылдиев «Өз жүрегіңнен ұялмайсың ба» әнімен халықты тәнті етті. Аңсарбек Қуанышев «Самға қазақ» әнімен дүйім жұрттың көңілінен шыға білсе, Нұртілек Ибрашев Ернар Жақсыбаевтың сөзіне жазылған Замир Ғұмаровтың Есен Шегрейұлына арналған «Есен аға» әнімен байқауды аяқтады.
Шара соңында Закария Сисенғали мен Есен Орақбаевтың ұрпақтары жас әншілер мен ақындарды марапаттап, алғыс хаттар, дипломдар, сыйлықтар және ақшалай сыйақы табыстады. Нәтижесінде, Махамбет Нұрахметов (Пятимар ауылы) жеңімпаз атанды. Жанболат Мұсағалиев (Жаңақала ауылы) ІІ орынға ие болса, Ербол Серікбай (Қызылоба ауылы) ІІІ орынды иеленді.
Райхан Амантайқызы,
Жаңақала ауданы
zhaikpress.kz
