Аудандық ардагерлер кеңесінің бастамасымен, аудандық ішкі саясат және аудандық мәдени демалыс орталығының бөлімінің қолдауымен батагөйлер байқауы өтті.
Соңғы жылдары дәстүрлі түрде ұйымдастырылып жүрген бұл байқау өз нәтижесін көрсете бастады. Аудандық кезеңнің жеңімпаздары облыстық аламанға қатысып, жүлделі орындардан көріне білді. Уақыт өте аудан ақсақалдары да бата беруге, жеті ата шежіресін таратып, топ алдында сөз бастауға кәдімгідей төселіп қапты.
Байқаудың беташар сөзін аудандық ардагерлер кеңесінің төрағасы Тілеген Арыстанбеков құттықтау сөзін айтып, байқауға қатысушыларға сәттілік тіледі.
Биылғы байқауға ауылдық округтерден тоғыз ақсақалымыз қатысуға ниет білдіріпті. Батагөйлеріміз бұл байқауда өзін таныстырып, өмірдің түрлі жағдайларында бата беріп, ұмыт бола бастаған салт-дәстүрлерден оқыған- білгендерін сынға салды.
Байқау нәтижесінде сайқынық Жасқайрат Сұлтанғалиев ІІІ орын, ұялылық Сайлау Мұхтаров ІІ орын иеленді. Бөрлілік Сейітқали Қуанышев байқау жеңімпазы боп танылды.
Байқауды қорытындылаған аудан әкімінің орынбасары Кенесары Нұршинов:
- Атадан өсиет қалмаса, жастарда қасиет болмайды. Өскелең ұрпаққа сөзімен де, ісімен де өнеге бола білудің өзі бір бақыт. Жарасты ғұмыр кеше береңіздер, - деп қатысушыларға игі тілегін білдірді.
Жеңімпаздарға грамотамен бірге ақшалай сертификаттар табысталды.
Баталы кешті ауданымыздың өнерпаздары әуезді әнімен әрлесе, балғын бишілеріміз әдемі билерімен айшықтады.
Анар Артықбай,
Суретке түсірген Жарқынай Салимова
Бөкей орда ауданы
