Республика күні басты ұлттық мереке ретінде жалпыхалықтық мейрамға айналып келеді. Бұл күннің мән-маңызын айшықтай түсетін түрлі шаралар мен жиындар, мерекелік концерттер әр ауылдық округте жаппай өткізіліп жатыр.
Бөкей ордасы аудандық мәдениет үйінде де бүгінгі күннің шырайын аша түсер мазмұнды да салтанатты шара өтіп, ауданның әлеуметтік-экономикалық және мәдени дамуына үлес қосып, қоғамдағы белсенділігімен көзге түсіп жүрген бірқатар азаматтар марапатталды.
Салтанатты жиынның шымылдығы аудан басшысы Нұрлыбек Даумовтың құттықтау сөздерімен ашылды.
– Қайырлы күн құрметті жерлестер, қадірменді аудан тұрғындары! Баршаңызды Ұлттық мереке – Республика күнімен шын жүректен құттықтаймын! Бұл мереке біртұтас Қазақстанның берекесі мен бірлігінің, әрбіріміздің туған өлкемізге деген шексіз сүйіспеншілігіміз бен адал еңбегіміздің нәтижелі нышаны деп білемін. Мемлекет басшысы Қ. Тоқаев ұлт ұясы Ұлытау жерінде өткен құрылтайда: «Ұлттық мерекелер мен атаулы күндер тізбесіне бірқатар өзгеріс енгізген жөн. Республика күні елдің мемлекет құру жолындағы тарихи қадамының символы болуы керек. Қазанның 25-ін, Егемендік күнін жыл сайын еліміздің басты мерекесі ретінде атап өтуіміз қажет» деп Республика күніне ұлттық мереке мәртебесін қайтаруды ұсынды. Президентіміздің бұл саяси шешімі егемендікке арқау болған декларацияны қабылдау туралы тарихи құжаттың салмағын еселеп, Тәуелсіздігіміздің тұғырын бекіте түсті, - деп бүгінгі мейрамның маңыздылығына тоқталып өткен аудан әкімі өнімді еңбегімен, жемісті қызметімен көзге түскен сала мамандары мен ардагерлерді марапаттады.
Түрлі салада ауданның алға басып, көркеюіне үлес қосқан азаматтардың қатарында аудандық электр торабының учаскелік шебері Асылболат Оңаев та бар. Ол ҚР Энергетика министрлігінің «Электр энергетикасы саласына қосқан үлесі үшін» медалімен марапатталды.
Ауылшаруашылығы қызметінің салалық кәсіптік одағының «Елеулі еңбегі үшін» медаліне Жансұлу Сәрсенғалиева мен Охас Ғазезов те ие болды.
Сондай-ақ, кеш барысында облыс басшысы Нариман Төреғалиевтің, «Аmanat» партиясының төрағасы Ерлан Қошановтың, «Аmanat» партиясы облыстық филиалының атқарушы хатшысы Азамат Сафималиевтің, аудан әкімінің алғысхаттары табыс етілді.
Еңбек адамдарының мерейі тасыған әдемі кеш жергілікті көркемөнерпаздардың бағдарламасымен жалғасты.
Арайлым Есмағұлова,
Бөкей ордасы ауданы
