Енді сайқындық өрендерге де атқа мініп, шабандоздықтың қыр-сырын үйренуге мүмкіндік туды. Қастерлі Тәуелсіздік мерекесінде аудандық ат спорты мектебі тұрғындар игілігіне пайдалануға берілді.
Аталмыш шараның ашылуында аудан басшысы Нұрлан Рахымжанов "Тарихымызға көз салсақ, бабаларымыз осынау ұлан-ғайыр атырапты ат үстінде жүріп қорғап қалған және негізгі тұрмыс-салты да ат өнерімен етене байланысты. Бүгінгі жас буын осынау киелі мұраға адалдық танытып, ұлттық спортымызды ұлықтауға ден қойса, шын қуанамыз. Алдағы уақытта біздің бөкейлік жасөспірімдер халықтық ойындарды шебер меңгеріп, ауданның мерейін үстем етеріне сеніміміз зор» деп ризашылығын білдірді.
Айта кетелік, ат спорты кешенінде әзірге қазақтың жабы тұқымдас алты жылқысы бар. Теңге алу, аударыспақ, жамбы ату, көкпар секілді ойындарға баулитын үйірмелерге 25 бала қабылданыпты.
- Ат спорты мектебінің ашылуы ауданымыз үшін үлкен оқиға деп білемін. Талай жарыстарда олжа салатын спортшыларымыз шығады деп үміттенемін. Қазіргі таңда білікті бір жаттықтырушы, бәйге атын баптайтын жігіттеріміз бар және тағы да алты адамға жұмыс орнын ұсындық. Басты мақсатымыз жасөспірімдерімізді ұлттық спорт түрлеріне баулу, - дейді аудандық жасөспірімдер мен спорт мектебінің директоры Дмитрий Семилиди.
Арайлым Есмағұл,
Бөкей ордасы ауданы
zhaikpress.kz
