Бөкей ордасы аудандық мәдениет үйінде 8 наурыз – Халықаралық әйелдер күніне арналған концерт өтті.
Айтулы күнгі шарада аудан әкімі Нұрлыбек Даумов ару аналарымызды көктем мерекесімен шын жүректен құттықтап, әлемге сүйіспеншілікпен қарайтын, жан-жағына жақсылық шарапатын сыйлап жүретін әйелдер қауымына жылы лебізін жеткізді.
Ерлер қауымы дайындаған мерекелік концертте белінен бесіктің табы кетпеген балабақтың бүлдіршіндерінен бастап, ел алдында жүрген азаматтарымыз өз өнерлерін көрсетті.
Концертте көркемсөз де оқылды, ән де айтылды. Вокалды аспапты ансамбльдің әуезді әндері, «Томирис» домбырашылар тобының күмбір күйі көрермен көңілінен шықты. Мемлекеттік қызметкер Ерлан Нүркеновтің жақсы әнімен шара шырайын келтірді.
Жоламан Сисенғалиевтің мерекелік әзіл арнауы да көптің ықыласына бөленді.
Бастауыш бүлдіршіндерінің хорымен басталған концерт әр салада қызмет жасайтын ер азаматтарымыздан құралған хордың орындауындағы ана тақырыбындағы өміршең әндермен тәмамдалды.
Ұлпан Әнуарқызы
Суретке түсірген Жарқынай Салимова
