Бүгін атажұртына келген Әлем чемпионы Өнер Сейілхан Бөкей ордасы ауданы Мұратсай ауылына да ат басын бұрды.
Мұратсайлықтар ел атын шығарған ерен ұлдарын ауылдың кіреберісінен күтіп алса, ауыл азаматы Мейірбек Бұқаров өз атынан, марқұм әкесінің құрдастары Өнерге тұлпар мінгізді.
Кездесу А.Құсайынов атындағы мектепте жалғасты, ауыл жастары чемпионды қуанышпен қарсы алып, құрмет көрсетті.
Ауыл әкімі Бисен Қадыров құттықтау сөз сөйлеп, чемпионға алғысхат, бапкері Берік ағамызға алғысхатпен қоса халықтың атынан қаржылай сертификат табыстады.
Ал Мейірбек Бұқаров қазақы салтпен балуанымыздың бапкері Берік Жарылқасыновтың иығына шапан жапты.
Мектеп директоры Нұрсұлу Әмірғалиева жүрекжарды тілегін арнап, чемпионға алғысхатын табыстап, шапан жапты. М.Бұқаров, М.Ғиылмановтар да меймандарға лебізін білдірді.
Шара соңында ауылдық ардагерлер кеңесінің төрағасы Шәпен Дүйсенғалиев чемпионға ақ батасын берді.
Дәл осындай кездесу Хан ордасында да жалғасты.
Анар Артықбай
Бөкей ордасы ауданы
