Бөрлі ауданында «Бөрлі аудандық ардагер ұстаздар ұйымының жұмысы – өмірлік өнегені ұлықтау» тақырыбында облыстық көшпелі семинар өтті.
Шараға аудандық ардагерлер ұйымының жетекшілері, «БҚО білім саласы ардагерлер ұйымы» қоғамдық бірлестігі кеңесінің мүшелері қатысты.
Алдымен ардагер ұстаздар ауданымыздағы «Белсенді ұзақ өмір сүру» және «Бақытты отбасы» орталықтарының жұмыстарымен танысты. Қадірлі меймандарды Бөрлі ауданы әкімінің орынбасары Алтай Тоқжанов қарсылап алып, жылы лебізін жеткізді. Ұстаздарға орталықтардың жұмыс жасау мақсаты түсіндірілді. Ардагерлер орталықтың қызмет алушыларымен жүздесіп, сұқбат құрды. Өз кезегінде «Белсенді ұзақ өмір сүру» орталығындағы үлкендер Мұхиттің әдемі әндерін әуелетті. Келуші меймандарда да құр қол қалмай, өнерлерін ортаға салды.
Шараның келесі бөлімі Ақсай қаласы №3 ЖОББ мектебінде жалғасын тапты. Келуші қонақтарды оқушылар әдемі әнмен қарсылап алды. Мектептен тыс жұмыс орталығының қосымша білім беру педагогі Рустам Жұмағазиев оқушылардың жұмысы қойылған көрмені таныстырды. Аудандық білім беру бөлімінің басшысы Айымгүл Тржанова барша ардагер ұстаздарға келгендері үшін алғыс айтып, мұндай мазмұнды, тағылымды іс-шаралардың жастар үшін маңыздылығына тоқталды.
Бөрлі ауданы ардагер ұстаздар ұйымының жетекшісі Роза Ахметова «Бөрлі аудандық ардагер ұстаздар ұйымының жұмысы – өмірлік өнегені ұлықтау» тақырыбында бейнеролик ұсынды. Одан соң бастауыш ардагерлер ұйымдарының іс-тәжірибелері атқарған жұмыстары туралы баяндамалар жасалды.
Ақсай қаласының №1 ЖОББМ директоры Жанар Жақсығалиева «Ардагер ұстаздар – мәртебе тұғырында», Ақсай қаласының №5 ЖОББМ ардагерлер ұйымының жетекшісі Сүйрік Бимағамбетова «Қалдырған ізің мәңгілік..» жобасы аясында атқарылған іс-шаралар туралы баяндама жасады. «Жас мамандар мен ардагер ұстаздар ынтымақтастығы» тақырыбында Ақсай қаласының №3 ЖОББМ ардагері, аудандық кеңестің мүшесі Надежда Шиганакова сөз сөйледі.
Шара кезінде қатысушылармен «Не? Қайда? Қашан?» тақырыбындағы топтық ойын ойнатылды. Ардагер ұстаздар «Әуенді тап» атты ән сайысында бақтарын сынады. Және де «Кім жылдам?» атты логикалық сұрақтардан құралған шағын ойынға аса қызығушылық танытты. Барлық қатысушылар шағын естелік сыйлықтармен марапатталды.
Шара соңында «БҚО білім саласы ардагерлер ұйымы» қоғамдық бірлестігі кеңесінің төрағасы Қанат Қырықбаев ұйымдастырушыларға алғысын айтып, ризашылығын білдірді. Қатысушылар өз ойларын ортаға салып, пікір алмасты.
Негізгі бөлім қорытындыланған соң ардагер ұстаздар Ақсай қаласы №3 ЖОББМ музейіне шолу жасады. Музей жетекшісі Ахмат Илиясов музей қоры туралы ақпарат берді.
Мейрамбек Сыдықов
Бөрлі ауданы
