Қостанай қаласында өткен шаңғы жарысынан жасөспірімдер мен юниорлар арасындағы ҚР чемпионатына Бөрлі ауданының спортшылары да қатысып, үздік нәтиже көрсетті.
Жарыстың алғашқы күні еркін әдіспен 5 шақырым қашықтықта Мадина Жақсылықова І орынды жеңіп алып қуантса, дәл осы әдісте 3 шақырым қашықтықта Жанерке Тудахунова да топ жарып, бірінші орыннан көрінді.
Жарыстың үшінші күні қоржынға тағы қос алтын медаль түсті. Бұл жолы 1 200 метр спринт қашықтықта бақ сынаған Мадина Жақсылықова мен кіші топтағы спринтерлер арасында Жанерке Тудахунова екінші мәрте жеңімпаз атанды.
Шаңғышыларымыз классика әдісімен 3 шақырым қашықтыққа жүргіруде де өз мықтылықтарын дәлелдеп, алдарына жан салмады. Сөйтіп тағы Мадина мен Жанерке алтын медальды мойындарына тақты.
Қос спортшымыз еліміздің абсолютты чемпиондары атанды.
Сондай-ақ, аталмыш чемпионатта Ләйла Мукатова, Анастасия Соколова, Адильбек Сарсембаев, Арын Тажибаевтармен бірге, 20 үздік спортшының қатарында өнер көрсеткен Алдияр Исаев мен Дамир Жубаниязов сынды аудан спортшылары өз бақтарын сынады.
Спортшыларды жарысқа дайындаған шаңғы жарысынан аға жаттықтырушы Ислам Сагиналиев.
Спортшылар мен жаттықтырушысы аталған жарысқа баруға қолдау білдірген Бөрлі ауданының шаңғы федерациясына алғыстарын білдірді.
Айым Нұрғалиева
Бөрлі ауданы
