Ассаламуағалейкүм уа рахматуллаһи уа баракатуһ, мұсылман жұрт!
Қадірменді жерлестер!
Бізді жоқтан бар қылып жаратқан Аллаға қисапсыз мақтау мен мадақтаулар, оның елшісі Мұхаммедке (оған Алланың игілігі мен сәлемі болсын) сансыз салауаттар мен сәлемдер болғай!
Міне, Алланың мейірімінің есігінің алдында тұрмыз. Рамазан айы келді. Баршаңызды берекенің кілті, мейірімнің нұры болған қасиетті айға аман жетулеріңізбен шын жүректен құттықтаймын. Құдай Тағала бізге отыз күндік құлшылықты шынайы иманмен, риясыз сеніммен және Жаратушының ұлы сыйынан үмітті хәлде атқаруды, сол сауаптарға кенелуді жазсын! Дұғалар қабыл болатын айда жанұямызға жақсылық, Отанымызға амандық тілейік!
Қазақстан Мұсылмандары Діни басқармасы 2025 жылдың Рамазан айы 1 наурыз күні басталып, 29 наурыз күні аяқталады деп хабарлады. Мүміндерге деген «сағыныштан» жыл сайын 10 күн ерте келетін Рамазан қыс айларына қарай жақындай бастады. Ыстықта қиналатын, ұзақ аш жүруге шыдамайтындар үшін Алла зор жеңілдіктер жасауда. Ауа-райы қолайлы, күн жаздағыдай ұзақ емес. Сондықтан, өзімізді ақтауға еш себеп жоқ.
Мұсылманның парыздары – қажылыққа баруға, зекет беруге белгілі бір деңгейде материалдық артықшылық керек. Ал, ораза, намаз – байдың да, кедейдің де қолынан келетін амал. Тек жүрек рұқсат етуі керек. Дініміз дәстүрімізбен, құлшылықты халық бірлігімен ұштастыру – өте маңызды.
Ораза тұтушылар таңнан қара кешке дейін ішу – жеуден тыйылады. Солардың құрметіне бірер ай түскі жиын-тойларды тоқтата тұрсақ еді.
Таспиықтың тасындай отыз күн сусып өте шығады. Рамазанның әр сәтін Алланың ризалығына жетуге пайдаланайық! Арамыз суыған ағайынмен татулассақ, кеудеде жүрген өкпелерді кешірсек, қадірін ұқпай жүрген жанұя – жақындарымызға көңіл бөлуді үйренсек, қысқасын айтқанда өзімізді «жеңсек», тәрбие бесігіне бөлей алсақ – міне, біздің табыс осыдан басталады.
Биыл Сырым ауданының орталығы Жымпитыдағы мешітке екі хафиз келіп, тарауық намаздарын жүргізеді. Тағы екі хафиз Алғабас ауылдық округіндегі мешітте қызмет етеді.
Мешітке төрлет, уа мұсылман! Үйімізге төрлет, уа Рамазан!
Нұрәлім Қисметов
Сырым ауданының бас имамы
