Қаратөбе аудандық мәдениет үйінде Ақжайық өңірін жырға қосып жүрген белгілі сазгер, Қазақстан композиторлар Одағының мүшесі, Қазақстанның еңбек сіңірген қайраткері, «Құрмет» орденінің иегері Донеділ Қажымовтың 70 жас мерейтойына арналған «Ақжайық, елге келсем, сен деп келем!» атты авторлық ән кеші өтті.
Айтулы авторлық кеш аудандық мәдени-демалыс орталығының әншісі Рүстем Ақташевтің орындауындағы Жолбарыс Баязитұлының сөзіне жазылған Донеділ Қажымовтың «Туған ел» әнімен басталды.
Сахнаға Сырым ауданының құрметті азаматы, М.Өтемісов атындағы университеттің профессоры, Халықаралық «Қадыр Мырза Әлі» қоғамдық қорының директоры Донеділ Ізмағамбетұлы құрметпен шақырылды.
– Кезінде ауданның мәдениет саласының көркемөнепаздарының біразымен бірге жұмыс жүргіздік. Марқұм Александр Қауеновпен дос болдым. Концерттік бағдарламамен кезінде Бейбіт Сағынғалиев ағамен бірге Мәскеуге бардық, құрдасым Мағзом Есендосовпен бірге ән шырқадық.
Құт дарып, кие қонған қасиетті Қаратөбе елі ерекше құрметке ие. Сал Мұхит, Ғарекең, Ескендір ағаларымыз, басқа да ұлы тұлғалар шыққан Қаратөбені әркез мақтан тұтып жүреміз,- деп Донеділ Ізмағамбетұлы қаратөбеліктерге жылы лебізін білдірді.
Донеділ ағамыз залда кезінде сахнада өзімен бірге ән шырқаған Мағзом, Бейбіт ағалармен бірге «Ақжайық – ару мекенім» әнін орындады.
Сонымен қатар Д.Қажымов сахнада өзінің «Жауап бер, уақыт», «Қадыр ақын – қыран жыр», «Алдымнан қалқам кезіктің», «Алтынай», «Өзіңмен ғана билеймін!», «Орал, әнім сенсің шалқыған!», «Ақжайық, елге келсем, сен деп келем!» әндерін шырқап, қаратөбелік әнсүйер көрермендердің ыстық ықыласына бөленді.
Авторлық кеште мәдени-демалыс орталығының көркемөнерпаздары А.Исмағұлова «Жайық жағалауы», Н.Салауат «Жеңешем», М.Байтемірова «Айлы түн», С.Байтеміров «Мен туралы», «Арын» тобы «Екеуміз» әндерін, Қ.Егінғали «Сылқым қыз» күйін орындады. Әнші, шөптікөлдік Әлия Жұбашева Донеділ ағамыздың әнін орындап, көпшіліктің көңілінен шықты.
Аудан әкімінің орынбасары Жасұлан Сұлтан Донеділ Ізмағамбетұлының әндерінің ерекшелігіне тоқталып, аудан әкімі Қадыржан Орынбасарұлының атынан алғысхат табыстап, сазгердің иығына шапан жауып құрмет көрсетті.
Ерболат Райсов,
Қаратөбе ауданы
zhaikpress.kz
