«Достықты әнмен тербеткен» атауымен Достық ауылдық мәдениет үйінде ауыл көркемөнерпаздарының есеп беру концерті өтті.
Кеште «Замандастар» әжелер ансамблі, «Айжұлдыз» тобы «Ауылдың адамдары-ай» әнін шырқаса, «Дос» тобы мен балалар вокалдық ансамблі Отан, туған жер туралы туындыларды тарту етті.
Сонымен қатар, «Талант» домбырашылар ансамблі мен «Достық» бишілер тобы да өз өнерлерін паш етті.
Концерт барысында көрермен ретро әншілердің 90-шы жылдардың әндерін орындады. Жеке орындаушылар арасында Шернияз Базаров «Ақторғын» әнін, ал Нұрбек Шәкен «Қызыл көйлек» әнін тамаша орындап, көпшіліктің қошеметіне ие болды.
Келген көрермен қазақтың әндері, күйлері мен билеріне ду қол шапалақпен қолдау көрсетіп, ризашылықтарын білдірді.
— Бүгінгі мәдени іс-шара жоғары деңгейде ұйымдастырылған. Ауылымыздың көркемөнерпаздары өз өнерлерін көрсете отырып, көрермендердің көңілін көтерді. Мұндай концерттер біздің ауылымыздың мәдениетін дамытуға, тұрғындардың бірлігін арттыруға үлкен үлес қосады. Бүгінгі кештің ұйымдастырылуына атсалысқан барша азаматтарға алғысымды білдіремін, - деді округ әкімі Әбубәкір Төлеуов.
Саида Жайық
Бәйтерек ауданы
