“Еңбек. Құндылық. Өмірлік жол” атты форум аясында Казталов ауданының еңбек адамдары да ерекше құрметке бөленді. Марапаттау шарасын ашқан аудан әкімінің орынбасары Серік Кайрлиев сөз алып, еңбекті бағалау мен жұмысшы мамандарды қолдауда Казталов ауданының алдыңғы қатарда екенін атап өтті. Ол еңбек адамының қоғамдағы рөлі мен маңыздылығына ерекше мән берді.
Одан кейін форум аясында марапаттау рәсімі өтті. Еңбек жолында үлгі көрсеткен аудандық мекемелер мен шаруашылықтардың мамандары, сондай-ақ жас мамандар арнайы дипломдармен және естелік сыйлықтармен марапатталды.
Олардың ішінде Көктерек ауылдық «Таза су» қондырғысының операторы Арман Есқайырұлы Жұбаткалиев 20 жылдық тәжірибесімен ерекшеленсе, Жалпақтал ауылдық округі электр торабының подстанция кезекшісі Максим Жақиянұлы Мусин 32 жыл бойы үздіксіз қызмет етіп келеді. Казталов аудандық электр торабының аға шебері Бауыржан Есмұханұлы Менешов 27 жылдық тәжірибесін кәсіби жетістіктерімен толықтырды.
Ауыл шаруашылығында да өз еңбегімен ерекшеленген мамандар бар. «Арман» шаруа қожалығының жетекшісі Айзада Жеңісқызы Уильянова мал шаруашылығын дамыту мен өнім сапасын арттыруға ерекше көңіл бөлсе, Казталов аудандық газ шаруашылығы мекемесінің слесарі Әділбек Жәнібекұлы Жанабаев кәсіби шеберлігімен танылды. Сонымен қатар, аудандық ветеринариялық станцияның мамандары Нұрым Біржанұлы Батырбай мен Мәулет Құттығалиұлы Бақытов жоғары жауапкершілік пен адалдық танытқан еңбектері үшін марапатталды.
Форумда жас мамандар да өз кәсіби шеберліктерін көрсетіп, «Үздік жас маман 2025» байқауының жеңімпаздары анықталды. Екатерина Михаиловна үздік аспазшы атанса, Жайнагүл Қайратқызы Төлекешева үздік IT маманы болды. Нұрлыбек Мәлікұлы Нығметолла құрылыс саласының үздігі деп танылса, Думан Мұрадымұлы Мұсабек ауыл шаруашылығы мамандары арасынан үздік шықты. Ал Ерген Есейұлы Серғазиев мал дәрігері аталымында жоғары кәсіби деңгейімен ерекшеленді.
Сондай-ақ аудан әкімінің орынбасары Серік Ерболатұлы форумда өз ойлары мен тәжірибелерімен бөліскен спикерлерімізге алғысхат табыстады.
Бүгінгі форум еңбек еткеннің еңсесі биік, мерейі үстем болатынын тағы бір мәрте дәлелдегендей.
Жұлдыз Асқар,
Казталов ауданы
