Бөрлі ауданында 2009-2013 жылы туған жасөспірім ұлдар мен қыздар арасында "GRAND TOUR BIATHLON " атты биатлоннан жасөспірімдер арасындағы Қазақстан Республикасы кубогының ІІ кезеңі басталды. Ол 2023 жылдың қыркүйек айында ашылған Ақсай қаласының шаңғы-биатлон базасында өтуде.
Жарыс 7-10 қаңтар аралығында болады. Бұл облысымыздағы жасөспірімдер шаңғы спорты түрінен өткізіліп отырған алғашқы бәсеке. Аталған жарысқа ауданымыздан 7 спортшы қатысуда.
Қатысушы командалар ауданымызға 5-қаңтар күні келіп, 6-қаңтар жаттығуларын бастады. Жарыс бағдарламасы бойынша 7-қаңтар спринт, 8-қаңтар жеке жарыс, 10-қаңтар эстафета өтеді. Қатысушылардың тізімінде Ақмола облысынан 2 команда, Павлодар, Қарағанды, Солтүстік Қазақстан, Шығыс Қазақстан облыстары және өз ауданымыздың командасы бар. Жарысқа барлығы 60-қа жуық спортшы қатысуда.
Бүгінгі шараға қатысып отырған қонақтар қатарында аудан әкімінің орынбасары Алтай Тоғжанов, Батыс Қазақстан облысының дене шынықтыру және спорт басқармасының жоғары жетістіктер спорты бөлімінің басшысы Нұрлан Казимов, Биатлоннан Қазақстан Республикасының мемлекеттік жаттықтырушысы Жанболат Мұстафин, Қазақстан биатлоншылар Одағының Бас хатшысы Манас Үсенов, Орал қаласының дене шынықтыру және спорт бөлімінің басшысы Армат Исанов, «БатысМұнайҚұрылыс» сервистік компаниясының директоры, Батыс Қазақстан облысының биатлон федерациясының президенті Әлібек Сарсембаевтар бар. Жарыстың бас төрешісі Вячеслав Морозов.
Салтанатты шара Қазақстан Республикасының Гимнімен ашылды. Қонақтар құттықтау сөз сөйлеп, қатысушыларға сәттілік тіледі.
Қазақстан Биатлоншылар Одағының қолдауымен, рейтинг нәтижесі бойынша 2008-2010 жылдары туған көшбасшы спортшылар 10-15 сәуір аралығында Норвегияда өтетін фестивальге және 2024 жылдың қарашасында Словенияда өтетін IBU спорт лагерьіне жіберіледі. Сонымен қатар, үздік деп танылған 3-5 командаға спорттық инвентарь алу үшін ақшалай сертификаттар табысталады. Одан бөлек ,әр кезеңдегі спринт және жеке жарыс үздіктері жеңімпаз күртешесімен және арнайы Кубокпен марапатталады. Жарыстың жаңа форматы ересектер арасындағы Әлем Кубогының кезеңдеріне сәйкестендірілген.
Бүгінгі спринт қашықтығы бойынша бақ сынаған спортшыларымыздың арасында ауданымыздың қос спортшысы жеңімпаз атанды. Бірі 2011-2013 ж.т. жасөспірім ұлдар арасында Арын Тәжібаев болса, екіншісі 2009-2010 ж.т. жасөспірім қыздар арасында Жанерке Тудахунова.
Арын Тәжібаев спринт қашықтығында 9:35 уақытпен топ жарса, қарсыластары павлодарлық Вячеслав Дымовских 10:01 уақытымен екінші орынды, шығысқазақстандық Федор Карпачев 10:15 уақытымен үшінші орынды иеленді. Ал жасөспірім қыздар арасында Жанерке Тудахунова 15:46 уақытымен мәре сызығын бірінші болып кессе, қарсыластары шығысқазақстандық Варвара Небогатова 16:00 уақытымен екінші және солтүстікқазақстандық Ульяна Кованова 18:08 уақытымен үшінші орынға табан тіреді.
Бөрлі ауданының атын биікке шығарып жүрген қос спортшымызда шаңғы жарысы бөлімінің жаттықтырушысы Ислам Сағыналиевтің шәкірттері.
2009-2010 ж.т. жасөспірім ұлдар арасында Никита Дудченко (ШҚО) бірінші, Руслан Ветригов (Ақмола облысы Балкашино) екінші, ал Егор Немцов (ШҚО) үшінші орынға жайғасты. 2011-2013 ж.т. жасөспірім қыздар арасындағы бәсекеде София Жигулина (Ақмола облысы Щучинск) мәреге алғашқы болып келсе, Ксения Крашкевич (Павлодар) екінші және Виктория Романцова (ШҚО) үшінші орынға ие болды. Жарыс жеңімпаздары мен жүлдегерлері арнайы кубокпен және сыйлықтармен марапатталды.
Ертең яғни, 8-қаңтар күні жас спортшыларымыз жеке жарыс түрінен бақтарын сынайтын болады.
Айдана Абдрахманова,
Бөрлі ауданы
zhaikpress.kz
