Атырау қаласында 3-4 қазан күндері дзюдо күресінен ұлдар мен қыздар арасында "Мағауия" спорт клубының қалалық ашық турнирі өтті. Жарысқа Қызылорда, Ақтөбе, Маңғыстау, Атырау қаласының аудандары және БҚО, Жаңақала ауданының 2008-2015 жылы туған ұл-қыздар қатысып, бақтарын сынады.
Жарыстың мақсаты - дзюдо күресін кеңінен насихаттау, дене тәрбиесі арқылы салауатты өмір салтын қалыптастыру, жасөспірімдердің спортқа ынтасын ояту, қызығушылығын арттыру. 1200 палуан қатысқан додалы сайыста Қырқопа ауылының палуандары жоғары деңгейде өнер көрсетіп, 2012-2013 жылғы туған жасөспірімдер арасында жаттықтырушы Әділет Қалиарыстановтың шәкірті Ислам Жәнібек 30 келі салмақ дәрежесінде жеңімпаз атанды.
- Ислам шәкіртім облыстық, республикалық жарыстарда жүлде алып, ауылымыздың, мектебіміздің атын шығарып, қуанышқа бөлеп жүр. Шәкірттерімнің жеңіс тұғырынан көрініп жатқаны бапкердің еңбегінің ақталғаны деп айтар едім. Алдағы уақытта бұдан да жоғары белестерді бағындыруға жұмыстанамын. Жеңісті күндеріміз таусылмасын, бізді шыңға шығаратын шәкірттеріміз көп болсын, - дейді Ә.Қалиарыстанов.
Арайлым Айденова,
Жаңақала ауданы
zhaikpress.kz
