Бүгін Орал қаласында «Жайық Пресс» медиахолдингінің ұйымдастыруымен «Жазу өнері. Журналист және жасанды интеллект» тақырыбында екі күнге созылатын медиафестиваль басталды. Аталған медиафестивальге қазақ тілді облыстық, аудандық редакциялардың, телевизияның, ақпарат агенттігінің редакторлары мен тілшілері, тіпті ақындар да қатысып, білімдерін жетілдірді.
Бірінші күні ардагер журналист, жазушы-публицист Қайнар Олжай «Жазу және редакциялау технологиясы» тақырыбында дәріс өткізді. Шыны керек, қазір аудандық газет редакцияларында аталған саланы оқып, меңгеріп келген тілшілер аз. Тіпті филологияның да маманы емес. Сол себепті бүгінгі дәріс қатысқандарға өте пайдалы болды десек қателеспейміз. Қайнар Олжайдың дәрісі журналистің жұмысын реттеу тақырыбынан басталды. Яғни журналист мақала жазбас бұрын мақаланың материалын дайындап, оны жазып, міндетті түрде редакциялап, содан кейін екі-үш рет оқу керек екен. Журналистке ең керек дағдыларды айтты. Журналист түрлі жанрларды айыра білу, үздіксіз жазып жүру, жеңілден ауырға ойысу, өзге әріптестерді күнделікті жіті оқу керек.
-Нағыз журналист үнемі дамып отыру керек. Сонымен қатар оқуға көп көңіл бөлу керек. Журналистің және редакцияның қорында А.Байтұрсынұлының «Әдебиет танытқыш», З.Қабдоловтың «Сөз өнері», І.Кеңесбаевтың «Қазақ тілінің фразеологиялық сөздігі», М.Райан мен Д.Ривкиннің 5 томдық «Әдебиет теориясы», Т.Нұртазиннің «Сөз құдыреті», М.Мағауиннің «Мен» атты екінші кітаптары болуы қажет. Сондай-ақ журналист, алдымен тарихты, яғни қазақ, КСРО, дүниежүзі тарихын жетік білгені абзал. Сол сияқты заң, жағырапия, логика мен психологияны да білу керек. Сонда ғана мақала жазғанда, сұхбат алғанда қиындық туындамайды,- деді Қайнар Қалиақпарұлы.
Жазушы-публицист жанр таңдаудағы жағдайлармен бөлісіп, жазу технологиясын үйретті. Сонымен қатар ол мақаланы дұрыс редакциялау мен тақырып таңдаудағы ерекшеліктерді де атап өтті.
Дәріс өте қызықты әрі қатысқан әр тілшіге пайдалы болды деп толық айтуға болады. Білетінімізден білмейтініміз өте көп. «Оқудан қалмау керек. Өз-өзіңізбен бір әлемде жүре берсеңіз, сол әлемде қалып қоясыз»,- деген Қайнар Олжайдың сөзі дөп айтылғандай. Аталған медиафестивальді ұйымдастырған «Жайық Пресс» медиахолдингіне көп рахмет!
Ертең фактчекер, журналист Жансерік Тілеухан «Жасанды интеллект және оның мүмкіндіктері» тақырыбында дәріс өткізеді. Ертеңгі әсермен де бөлісетін боламыз.
Гүлзара Мәди
Жәнібек ауданы
