Қазақ өмірінің ырысын малдан тапқан халық. Тұрмысы да малдың ыңғайына қарай бейімделген. Жазда жайлауға жайып, қыста қыстауға айдап, қамшының сабындай ғұмырын мал өсімі бағытына арнаған. Себебі, атакәсіпте береке бар. Сауып сүтін ішіп, сойып етін жеп, тіпті, терісінен түрлі киім кешек, аяқ киім, ер тоқым секілді тұрмыстық қажеттілікке жарамды қыруар материал жасаған.
”Малым жанымның садақасы”-деген сөзде осы несібелі жұмыстың арқасына тіреу болып тұрғандай. Қазір қыстақтардың басы қыбыр - қыбыр тіршілік.
Кеше Сырым ауданына қарасты, Шолақаңқаты ауылдық округіндегі бірқатар қыстақтың еңбек тынысымен танысып қайттық.“Правда” шаруа қожалығы - нағыз еңбекқорлардан құралған ұжым. Төрт түлік малын маңдайының теріне суарған шаруашылық Құспанкөл елді мекенінде орналасқан. Жетекшісі Қайрат Меңдіғалиевтің дерегіне сүйенсек қыстақта ангус, герефорд, ақбас тұқымдарын есепке алғанда 300 ден астам ірі қара малы бар. Оның 100 - ге жуығы бордақылауға байланған. Биыл қыс жайлы басталды. Жылқы әлі тебінде жүр, азыққа қарайлай қоймаған.Яғни, 250 бас аналықты есептегенде барлығы 450 бас жылқы малы дала құшағында, тебінде.
Ұсақ малға келер болсақ, төл алу науқанын ойдағыдай өткеру үшін дайындық тыңғылықты. 480 бас саулық шаруалардың күтімінде тұр. Қайрат Меңдіғалиев ауылдас 7 азаматты жұмыспен қамтып отыр. Олар қыста айыр - күректі қолға алып мал жайлап еңбек етсе, жер аяғы кеңіген уақта егін егіп, алқапта шөп шауып, қара күзге дейін 3200 гектарды игереді. Шаруашылықтың техникалық паркінде 6 трактор, 1 комбайн бар. “Темір жауынгерлер” ала жаздай қыстың қамы үшін 4500 бума шөп дайындады.
Қожалықтың әр күні түсінген адамға еңбек сабағы іспетті. “Еңбек еткен адам ешқашан жерде қалмайды.Қазіргі жастар соны ұқса екен деймін”- дейді, шаруашылық жетекшісі Қайрат Меңдіғалиев.
Қоңдыкер Елеуов,
Сырым ауданы
