Бүгін Жәнібек ауданы әкімі Азамат Сафималиев Жақсыбай ауылдық округіне барып, көктемдегі су тасқыны кезінде зардап шеккен су өткізу құбырлары, тұрғын үйлер және жаяу жүргіншілерге арналған өткелді қалпына келтіру жұмыстарының барысымен танысып қайтты.
Су өткізу құбырларын қалпына келтіруді қолға алған мердігер «Брат М» жауапкершілігі шектеулі серіктестігі келісімшарт бойынша желтоқсан айының 28-іне дейін 9 су өткізу құбырын жөндеуі керек. Қазіргі таңда жоспарға сай жұмыс жасалып жатыр.
Сонымен қатар ауылда салынып жатқан 7 тұрғын үйдің қабырғалары қаланып, төбелері жабылып, терезелері орнатылған. Ішкі әрлеу жұмыстары жүргізілуде.
Жаяу жүргіншілерге арналған өткелді қалпына келтіруге аудан бюджетінен 2 миллион теңге бөлініп, өткелге қажетті жабдықтар сатып алынған болатын. Бүгінде ауыл әкімдігінің ұйымдастыруымен өткел қалпына келтіріліп, қолданысқа берілді. Бұл өткел ауыл тұрғындары үшін маңызды нысандардың бірі болғандықтан, жөндеу жұмыстарынан кейін ауыл халқы ризашылықтарын білдіріп жатыр.
Бақытжан Серіков,
Жәнібек ауданы
