Үстіміздегі жылы Казталов ауданының Қараөзен ауылында жалпы аумағы 227,67 шаршы метрді құрайтын фельдшерлік акушерлік пункттің құрылысы басталған болатын. Нысанға тапсырыс беруші Батыс Қазақстан облыстық құрылыс басқармасы мемлекеттік мекемесі болса, мердігер болып «Альтаир СК-7» жауапкершілігі шектеулі серіктестігі танылды.
- Нысанның құрылысы белгіленген уақытында басталып, қазіргі таңда аяқталуға жақын. Құрылыс жұмыстары кедергісіз жүріп жатыр. Қажетті техникалар да, материалдар да жеткілікті. Алдымыздағы қараша айында нысанды толықтай тапсырамыз деген жоспарымыз бар. Құрылыс жұмыстарын мамандардың нұсқауымен ауылдың жігіттері (жергілікті тұрғындар) жүргізуде, - дейді нысанның басы-қасында жүрген учаске бастығы Нұрлан Айшов.
Біраздан бері өзекті мәселеге айналып, жергілікті тұрғындардың үлкен сұранысына ие болған медицина мекемесінің құрылысы сәтті аяқталып, алдағы уақытта ауыл тұрғындарына мінсіз қызмет көрсетеді деп сенеміз.
Қыдыр Харесұлы,
Казталов ауданы
zhaikpress.kz
