Желтоқсан айының 27-сі күні Қаратөбе ауданы орталығы Қаратөбе ауылында есігімізден еніп, төрімізден орын алғалы тұрған Жаңа жыл мерекесіне орай оқу үлгерімдері жақсы оқушыларға арналған аудан әкімінің шыршасы өтті.
Жаңа жылдық мерекелік шараға аудан әкімі Қ.Сүйеуғалиев, аудан әкімінің орынбасары Ж.Сұлтан, аудандық білім беру бөлімінің басшысы Берікжан Ғарапшиев қатысты.
Аудан әкімінің жаңа жылдық шыршасына ауданның барлық мектептерінен оқушылар қатысты.
Мерекелік шарада аудан әкімі Қ.Орынбасарұлы сөз сөйлеп, балаларды Жаңа жыл мерекесімен құттықтады.
–Жаңа Жылдан жақсылық пен жаңа жаңалықтар күтеміз. Жаңа ықыласпен, игі тілектерімен жаңа жылға қадам басамыз. Ескі жыл еліміз үшін мерейлі жылы болды. Барлық салада да өсіп, өркендеу бар. Білім саласы да жақсы нәтиже көрсетіп келеді. Бүлдіршіндердің сабақтарын жақсы оқып, оқуда озат болуларына тілектеспін. Жаңа жыл жаңа жетістіктер мен жаңа мүмкіндіктерге толы болсын, – деген аудан басшысы балалармен бірге мерекелік шыршаның шырағын жақты.
Мерекелік шарада аудан әкімі балаларға жаңа жылдық сыйлықтар табыстады.
Әкім шыршасында Аяз ата, Ақшақар және түрлі ертегі кейіпкерлері жиналғандарға көңіл күй сыйлап, мерекелік кеш думанға ұласты. Әсем әндер айтылып, қойылымдар орындалды.
Аудан әкімінің балаларға арналған шырша тойы кішкентай бүлдіршіндер үшін өте қызықты және есте қаларлықтай деңгейде ұйымдастырылды.
Райымбек Абай,
Қаратөбе ауданы
zhaikpress.kz
