Бүгін Қаратөбе ауданының орталығындағы Мұхит атындағы жалпы орта білім беретін мектебінде ақын күйші, батыр Махамбет Өтемісұлының туғанына 220 жыл толуына орай 8-11 сынып оқушылары арасында өткен «Махамбет мұрасы – ұлттық рухтың қайнары» атты аудандық Махамбет оқулары, күй тарту және әскери-патриоттық, спорттық ойындары жарыстары өтті.
Ашылу салтанатында аудандық ішкі саясат бөлімінің басшысы Нұртас Набиоллаұлы, мектеп директорының оқу ісі жөніндегі орынбасары Арайлым Қуанғалиқызы сөз алып, жарысқа қатысушы жас өрендерді іс-шараның ашылу салтанатымен құттықтап, аталмыш жарыста жеңіске жетулеріне сәттілік тіледі.
Сап түзеген жас өрендерге Нұртас Набиоллаұлы Махамбет батырдың ерлігі мен өнері туралы әңгімелеп берді.
Мектеп оқушылары арасында Махамбеттің ұлтына ұран болған рухы биік туындыларын насихаттау, олардың шығармашылық қабілеттерін, эстетикалық талғамдарын дамыту, тарихи деректер бойынша тұжырым жасай білу дағдысына үйрету, түсініктерді деректермен, дәйексөзбен дәлелдеуге жаттықтыру, дарынды балаларды анықтау және қолдау, әдеби мұралардың жүйелі оқылуын жолға қою, Отанға деген сүйіспеншілік сезімін қалыптастыру арқылы адамгершілігі мол, парасатты тұлғаны тәрбиелеу, оқушылардың спортқа қызығушылығын арттырып, достыққа баулуды мақсат еткен іс-шараға аудандық білім беру бөлімінің әдіскерлері Гүлімхан Болатқызы мен Оралбай Берікұлы, Мұхит атындағы ОЖБМ-нің алғашқы әскери дайындық пәнінің мұғалімі Мержан Асқарұлы және аудан мектептерінің алғашқы әскери дайындық пәнінің мұғалімдері қатысты.
Аталмыш байқау 3 бағыттан тұрды.
Байқаудың «Ел құтқарар ер едім» бағытында Махамбет шығармалары жатқа оқылса, «Тартынбай сөйлер асылмын» - атты бағытында жас ақындар өз туындыларын мәнерлеп оқыды. Ал, «Шашақты найза шалқар күй» бойынша оқушылар Махамбеттің күйлерін орындаса, «Ереуіл атқа ер салмай, егеулі найза қолға алмай енку-енку жер шалмай ерлердің ісі бітерме» бағытында әскери-патриоттық ойындар сайысы оздырылды.
Жарыстың қорытындысында Махамбет оқуларын жатқа оқудан Мұхит ЖОББМ-нің оқушысы Кәусар Ислямқызы І орынды жеңіп алса, жүлделі ІІ орынды Шөптікөл МББК-нің оқушысы Тоғжан Серікова, ІІІ орынды Ханкөл ЖОББМ-нің оқушысы Дана Айтқалиева иеленді.
Махамбет күйлерін орындау бойынша өнер көрсеткен Мұхит ЖОББМ-нің оқушысы Арман Лұқпанов І орынды жеңіп алып, жарыс жеңімпазы атанды. Жүлделі ІІ орынды «Қ.Жұмалиев» атындағы Қаратөбе мектеп-гимназиясының оқушысы Гүлзат Қадыржанова иеленсе, ІІІ орын Шөптікөл МББК-нің оқушысы Жангүлім Берікқызына бұйырды.
Әскери-патриоттық ойындар сайысы бойынша ұлдар арасында кермеге тартылу, қыздар арасында шалқадан жатып денені көтеру, пневматикалық винтовкадан ату, АК-74 автоматын бұзып қайта жинаудан, команда бойынша арқан тартыстан өткен сайыста жалпы командалық есепте І орынды иеленген Мұхит ЖОББМ командасы жарыс жеңімпазы атанды. Жүлделі ІІ орын «Қ.Жұмалиев» атындағы Қаратөбе мектеп-гимназиясының командасына бұйырды. Ал, ІІІ орынды Шөптікөл ЖОББМК-нің командасы қанжығаларына байлады.
Қалған командаларарға Алғысхаттар табысталды.
Ерболат Мырзағұлұлы
Қаратөбе ауданы
