«AMANAT» партиясы жүзеге асырып жатқан «Қарызсыз қоғам» қаржылық сауаттылықты арттыру жобасы аясында тұрғындарды оқыту басталды.
Тұрғындарды оқыту семинарына Тасқала ауданы әкімінің орынбасары Саягүл Ғалиева, «AMANAT» партиясы Тасқала аудандық филиалының төрағасы Люция Жұбанышқалиева, аудандық ішкі саясат бөлімінің басшысы Думан Ғазез қатысты.
Алдымен сөз алған Саягүл Мәулетқызы оқуға қатысушылардың жұмысына сәттілік тіледі.
– Семинарға қатысып отырғандарыңызға қуаныштымын. Оқуға қатысушылардан сұрайтыным, осындай мүмкіндік барда пайдалы ақпаратты алып қалыңыздар. Алған ақпаратыңыздың алдағы уақытта көп көмегі тиетініне сенеміз. Баршаңызға сәттілік тілеймін, – деді ол.
Одан әрі сөз алған жоба менторы Зульфия Тынымгерейқызы қаржы мәселесі қалай пайда болатынын, дәл қазіргі уақытта несие қарызын азайтудың қандай жолдары бар екенін түсіндірді.
– «Қарызсыз қоғам» жобасы былтыр БҚОда пилоттық режимде өткізілді. Былтыр 9 405 адам оқу оқыды. Соның ішінде Тасқала ауданында 450-ге жуық адам қаржылық сауаттылықты арттыру бойынша оқып шықты. «Қарызсыз қоғам» жобасының негізгі мақсаты – халықтың қаржылық сауатын арттыру. Айта кету керек, кімде несие бар, отбасы бюджетін қалай дұрыс жүргізу керек, тағы да басқа бағыттарда жұмыстанамыз. Тек оқыту емес, сондай-ақ бізбен бірге бір топ заңгер жұмыс істеп жатыр. Олар екінші деңгейлі банктермен және қаржы ұйымдарымен тікелей жұмыстанады. Егер түске дейін оқу болса, түстен кейін жеке кеңес беріледі. Онда тұрғындар өздеріне қажет кеңес алады. Біздің заңгерлер екінші деңгейлі банктерге жолығып, азаматтардың бұғатталған шоттарын шешу, несиелерін ыңғайлы кестеге қою сынды жұмыспен айналысады. Бұл қызметтің бәрі тегін көрсетіледі. Әр топ бес күн жұмыс істейді, – дейді Зульфия Тынымгерейқызы.
Болатбек Сапарғалиев,
Тасқала ауданы
zhaikpress.kz
