Бүгін Жаңақала аудандық жастармен жұмыс жөніндегі ресурстық орталықтың ұйымдастыруымен оқушылар және студенттердің ауданымыздағы жас жеке кәсіпкерлерімен кездесуі өтті.
Іс-шараның мақсаты – жастарды кәсіпкерлермен кездестіре отырып, жеке бизнес саласына деген қызығушылықтарын арттыру, бизнес туралы түсінік бере отырып, әр сала мамандарының жұмысымен таныстыру.
Аталмыш шараға ауылымызды көркейтуге, түрлі саланы дамытуға күш-жігерін салып, халыққа өз қызметтерін ұсынып, еңбек етіп жүрген ЖК «Ernur barber Shop» салонының жетекшісі Ернұр Жұмасейіт, ЖК «Jardem Dent» тіс емханасының дәрігері, жеке кәсіпкер Серік Жәрдемов, ЖК «ElaDos» жиһаз цехының жетекшісі Еламан Утеев, «Taufood» дәмханасының жетекшісі Ерхат Нәсіпқалиев және жеке шаруа қожалығының жетекшісі, «Үздік кәсіпкер – 2022» номинациясының иегері Жантілек Мақсотов қатысты.
Жиын барысында жастармен жұмыс жөніндегі ресурстық орталықтың басшысы Дәурен Мерешов жастармен іс-тәжірибесін бөлісудегі жақсы ниеттері үшін кәсіпкерлерге алғыс айтты. Содан соң кәсіп иелері қазіргі таңдағы жұмыс нәтижесіне қалай қол жеткізгендігін, қандай еңбектің арқасында жеткенін, сабақ алған қателіктерімен, ақыл-кеңестерімен, алға қойған мақсаттарымен бөлісті. Болашақ жастардың қолында екенін ұғындырып, көздеген мақсатына жету үшін ерінбей еңбек етуге шақырды.
Іс-шара оқушылар өздерін қызықтырған сұрақтар бойынша жауап алып, естелік фотосуретке түсумен аяқталды.
Нұргүл Елтайқызы,
Жаңақала ауданы,
zhaikpress.kz
