Наурызнама онкүндігінің шеңберінде Жаңару күні Казталов ауданында сан салада қызмет атқарған жастардың қатысуымен «Қазақша quiz» интеллектуалдық ойыны өтті.
Аудандық ішкі саясаттың ұйытқы болуымен өткен жастар ресурстық орталығының ұйымдастырған білімділер додасына 5 команда бақ сынады. Бұл білімділер бәйгесінің негізгі мақсаты – жастардың білімі мен біліктілігін шыңдай отырып, қазақ халқының төл мәдениеті мен өнерін, салт-дәстүрін дәріптеу.
Бәсі биік бәсекеге білім, спорт, әлеуметтік, мәдениет, мемлекеттік саланың мамандары да, сондай-ақ жас кәсіпкерлер де қалыс қалмады. Өз саласын терең меңгерген жас мамандар «Наурызнама», «Тұлғаны таны», «Бір ортақ сөз», «Дәстүр сөйлейді», «Біздің кино», «Бәс» атты 6 кезең бойынша бақтарын сынап, білімдерімен, шапшаңдықтарын, тапқырлықтарын көрсетті.
Нәтижесінде І орынды «Бірлік» командасы, ІІ орынды «Бірлік Алма» командасы, ІІІ орынды «Дәстүр» командасы иеленіп, алғысхаттар табыс етілді.
Жұлдыз Асқар,
Казталов ауданы
zhaikpress.kz
