Оқушылардың жоғары білім көрсетіп, грантқа ие болғанын талай естідік. Ал, мектептің грант алғанын естідіңіз бе?! Қаратөбе ауданындағы мектеп осындай жетістікке жетіп отыр.
Жуырда Батыс Қазақстан облыстық білім басқармасы ұйымдастырған “Үздік білім беру ұйымы - 2023” байқауы мәресіне жетті. Білім көрсеткіші мен тәрбие-тәлім жұмысы бағаланған байқау қорытындысы бойынша Қаратөбе аудандық Қ.Жұмалиев атындағы мектеп - гимназиясы өңірдегі іргелі мектептерді ізіне қалдырып, жеңімпаз атанды.
Осылайша, біздің гимназия Батыс Қазақстан облысы әкімі тағайындаған 48 миллион теңге сыйақыны иеленіп, “миллионер -мектеп” болып шыға келді.
Білім ордасына Қажым Жұмалиев есімі берілгені күні кеше еді. Міне, академиктің аты жарқ етіп білім биігінен көрінуде.
Бүгінде Қ. Жұмалиев атындағы мектеп - гимназияда 254 оқушы білім алады. 2022-2023 оқу жылы ҰБТ-дегі көрсеткен білім деңгейі бойынша Қаратөбе гимназиясы республикадағы «Үздік 100 мектеп» қатарына кірді.
Бауыржан Ширмединұлы,
“Қаратөбе өңірі”
