Кеше Орал қаласындағы Қазақстан инновациялық және телекоммуникациялық жүйелер университетінің өкілдері Казталов ауданына жұмыс сапарымен келді.
Ауданға ат басын тіреген қонақтарды Казталов ауылдық округінің әкімі Ернар Ғалымов, аудандық мәдениет және тілдерді дамыту бөлімінің басшысы Ернар Аққалиұлы және бір топ аудан жастары қарсы алып, ауыл дәмін ұсынды.
Достық саябағында болған жастармен кездесуде КАЗИИТУ ұжымы университеттің мүмкіндіктерін айта отырып, көрмеге робототехника бойынша танымдық техникаларын ұсынды. Жасөспірімдер мен балалар қызығушылық танытып, сұрақтарына жауаптарын алып жатты.
Кездесу барысында университет ректоры Әліби Науханұлы Баяхов ауданның жастарын жетекші университетте лайыкты білім алуға шакыра отырып, оқу орнының жеткен жетістіктеріне тоқталды. Өз сөзін жастарға жалынды тілегімен аяқтаған ректор, аудан әкімінің атына жазылған алғысхат табыстады.
Аудан жастарымен болған кездесуде караокеде ән шырқап, флешмоб биледі. Кездесу одан әрі жас жеткіншектердің би кешімен жалғасты. Шара барысында белсенділік танытқан жастарға шарын сыйлыктар беріліп, университет жайында ақпараттық қағаздар үйлестірілді.
Мейірім Парасат,
Казталов ауданы
