Кеше Жұлдыз елді мекенінде тұрғын үй кезегіндегі және Жас елді мекеніне «Қаладан-ауылға» бағдарламасымен көшіп келген отбасыларға баспаналарының кілттері салтанатты түрде табысталды. Қарасу ауылдық округіне қарасты Жұлдыз елді мекенінде өткен іс-шараға аудан әкімі Асланбек Сарқұлов, аудандық мәслихат депутаты Серікбол Қадемов қатысты.
Аудан әкімі Асланбек Ахметоллаұлы баспана иелерін қуанышымен құттықтап, жылы лебізін білдірді.
— Баршаңызды алдымен Жаңа жыл мерекесімен шын жүректен құттықтаймын! Өткен жылы Жұлдыз ауылында жаңа мектептің ашылу салтанатында облыс әкімі Жұлдызға тұрғын үйлер салу жөнінде тапсырма берген болатын. Бүгін айтулы мереке қарсаңында Жұлдыз және Жас елді мекендерінің тұрғындарына баспана кілтін табыстап отырмыз. Мемлекет басшысы Қасым-Жомарт Кемелұлы Үкіметке үй кезегінде тұрған әлеуметтік осал топтағы азаматтардың баспана мәселесін шешу жөнінде нақты тапсырма берген болатын. Сонымен қатар облыс әкімі Нариман Төреғалиұлының бастамасымен өңірімізде «Қаладан-ауылға» бағдарламасы да жүзеге асып, халыққа мол мүмкіндіктер туғызуда. Президенттің тапсырмасына сәйкес биылғы жылы Казталов ауданы бойынша 28 елді-мекенде үй кезегінде тұрған әлеуметтік осал топтағы отбасыларға арнап қос пәтерден 142 үй салынуда. Тұрғын үйге ие болып жатқан азаматтарды құттықтай отырып, отбасыларыңыздың амандығын, шаңырақ шаттығын тілеймін, — деді аудан әкімі.
Баспанаға ие болған азаматтар да қуаныштарымен бөлісіп, ризашылықтарын білдірді.
— Бүгін үйіміздің кілтін алғанымызға қуаныштымыз. Үйлер заман талабына сай салынған. Бастысы ауыл халқы құшақ жая қарсы алып, ізгі ниеттерін білдіруде. Сонымен қатар, алдағы уақытта ауыл азаматтары қолдауымен мал берілетіні де көңілге қуаныш сыйлады. «Қаладан-ауылға» бағдарламасы қаладағы ауыл азаматтары үшін үміт сыйлар жоба. Осындай игі бастамалары және қолдау көрсеткені үшін өңір, аудан басшылығына алғысымыз шексіз, — деді Қараөзен ауылдық округінің Жас елді мекенінің тұрғыны Сырымбет Қарин.
Казталов ауданында ағымдағы жылы бірқатар инфрақұрылымдық жобалар жүзеге асырылуда. Соның бірі аудан халқының игілігі үшін салынып жатқан тұрғын үйлердің құрылыс жұмыстары. Бұл аудан тұрғындарының әл-ауқатын арттыруға сеп болмақ.
Асылбек Нәсіпқали
Казталов ауданы
