Бүгінгі таңда Казталов аудандық білім беру бөлімінің басшысы Самал Қанапияқызы педагогтердің кәсіби құзыреттілігін үздіксіз арттыруда, сонымен қатар білім беру сапасында тәжірибе мен теорияның қажеттігін ескере отырып, тағы бір жаңа бастаманы қолға алды.
Білім сапасын арттыра отырып, тың идеялар мен өзгерістерді мақсат еткен бұл бастама – мектептің жүрегі, ұстаздардың тірегі, бала жанының бағбандары бола білген директорлардың бас қосуы. Ғ.Молдашев атындағы білім ордасында басталған алғашқы семинарға Орал қаласындағы педагогикалық шеберлік орталығы филиалының тренері Ж. Мыңбаева, Тасқала ауданы білім беру бөлімінің басшысы А.Касимова, АӘК кабинетінің меңгерушісі Л.Габбасова және мектеп директорлары қатысты.
Жаңа бастаманың мақсаты да белгілі. Көзделген нәтиже - директорлардың арасында бәсекені қалыптастыру, басшылардың коммуникалдық және менеджмендтік қасиеттерін дамыту арқылы жаңа жобалармен жұмыс жүргізуіне мүмкіндік беру, сондай-ақ кәсіби мәселелерді шешетін идеяларды енгізуге, өз іскерліктерін көрсетуге мүмкіндік беру еді.
Директорлар клубын ұйымдастырудағы негізгі ұстаным осы басымдықтарға ерекше көңіл бөлу арқылы өзара бәсеке қалыптастырып, басқарушылық бағыттағы көзқарасты жаңа заманға сай бейімдеу болатын. Ой алаңында барлық директорлар өзіндік пікірін айтып, көзқарастарын білдірді. Ішкі талдау, сыни ойлау сынды мәселелерде қамтылды.
К.Меңдәлиев мектебінен басталған серпінді семинарда келген қонақтар К.Меңдәлиев ескерткішіне гүл шоқтарын қойып, қазақтың киелі домбырасын паш еткен өнерпаздардың өнерлерін тамашалады.
Сондай-ақ мектеп ішіндегі тарихы тұнған мұражаймен танысып, талантты өнерпаздардың қойылымына назар аударды. Ғ.Модашев білім ордасындағы «Ұлттық нақыштар» көрмесі мен «Наурыз Party» жобасы ерекше болды. Семинардан соң өнерді үкілеген киелі шаңыраққа бас сұғып, «Қыз Жібек» ансамблінің өнеріне бек ризашылықтарын білдірді.
Бөлім басшысы болашаққа бағытталған маңызды бастамаға үлестерін қосып, жоғарғы деңгейде ұйымдастырған әріптестеріне алғысын жеткізді.
Жұлдыз Асқар,
Казталов ауданы
zhaikpress.kz
