Кеше Көктерек ауылдық округіне қарасты Саралжын елді мекенінде саралжындықтар мен сатыбалдылықтарға тұрғын үйлердің кілті табысталды. Салтанатты іс-шараға аудан әкімі Асланбек Сарқұлов, аудандық мәслихат төрағасы Сарсенбай Молдашев, аудандық мәслихат депутаты Серікбол Қадемов қатысты, деп хабарлайды Казталов ауданы әкімдігінің баспасөз қызметі.
Ауданымызда «Тұрғын үй-коммуналдық инфрақұрылымды дамытудың 2029 жылға дейінгі тұжырымдамасы» аясында құрылыс жұмыстары қарқынды жүруде. Сонымен қатар облыс әкімі Нариман Төреғалиұлының бастамасымен жүзеге асырылып жатқан «Қаладан-ауылға» бағдарламасы да нәтижелі жүзеге асуда. Бүгін екі отбасы тұрғын үй кезегі бойынша баспанаға ие болса, «Қаладан-ауылға» бағдарламасымен көшіп келген 4 отбасыға заманауи тұрғын үйлердің кілті табысталды. Сондай-ақ ауылға көшіп келген қалалықтарға жергілікті шаруа қожалық жетекшілері мен ауыл азаматтары қолдау көрсетіп, төрт-түлік малын сыйға беруде. Асарлатқан ағайынға бағдарлама қатысушылары да риза.
— Маған жаз мезгілінде округ әкімі Бақытжан Сатқанұлы хабарласып, өңірімізде «Қаладан-ауылға» атты бағдарлама бастау алғанын жеткізді. Бағдарлама аясында баспанамен, азын аулақ малмен қамтамасыз етіп, жұмысқа орналасуыма да кепілдік беретіндерін атап өткен болатын. Келісімімді беріп, туған жеріме көшіп келіп, тұрақты жұмысқа орналастым. Бүгін көптен күткен баспанамызға ие болып жатырмыз. Өте қуаныштымыз. Осындай бағдарламаның бастамашысы облыс әкіміне, жергілікті атқарушы орган өкілдеріне алғысымыз шексіз, — деді Ербол Сарсембаев.
Қойнауына құт дарыған қос елді мекеннің тұрғындары да қатарының толығып, жастардың ауылға мойын бұрғанына қуанышты екенін жеткізді. Салтанатты іс-шарада сөз алған аудандық мәслихат депутаты Серікбол Қадемов, мердігер Ұлан Жұмабаев, зейнеткер Молдағали Төлегенов жылы лебіздерін білдіріп, бағдарламаның игілігі мол екенін атап өтті.
Айта кетейік, Сатыбалды ауылынан Қанағат Абужалитов, Саралжын ауылынан Ұлан Жұмабаев және Марат Ихсанов тұрғын құрылыстарын жүргізген болатын.
Асылбек Нәсіпқали
Казталов ауданы
