Араздасқан достасып, салқын сезімнен қоштасатын қауышу күні биыл аудандық мәдениет үйі алдында ерекше аталып өтті. Жиылған жұрт құшағын айқара ашып, бір-бірін жаңа жасымен құттықтады. Казталов жұрты үшін осы мерекеде айтылған ізгі тілектер мен үлкендердің ақ батасы жаңа үміт пен жігер сыйлады.
14 наурыз — Амал күні С.Садықов атындағы аудандық мәдениет үйінің жанындағы «Достық» саябағында сонау сақтар заманынан, Тұмар патшайым дәуірінен бері жалғасып келе жатқан ұлттық дәстүр насихатталды.
Игі шараны аудан өнерпаздары ұйымдастырды. Қыстан аман-есен шығып, бір-бірімен құшақтасып көріскен ауыл тұрғындары бас қосып, көрісудің көркін келтірді. Шара барысында жиналғандарды мерекемен құттықтаған аудан әкімі Асланбек Сарқұлов:
–Көрісу күні құтты болсын! Көрісу – ата-бабамыздың ұрпақтан-ұрпаққа мұра қылып қалдырған дәстүрлерінің бірі. Бір кездері бұл мереке еліміздің батыс өңірінде ғана атап өтілетін еді. Енді міне жалпыхалықтық сипат алып, Амал мерекесі ретінде күллі қазақ жерінде тойланады. Бұл салт-дәстүріміздің жаңғыруының көрінісі. Мемлекет басшысы Қасым-Жомарт Кемелұлы Тоқаев өзінің «Тәуелсіздік бәрінен қымбат» атты мақаласында Наурыз мейрамын тойлау тұжырымдамасын әзірлеуді, көктем мерекесінің мазмұнын байытуды тапсырды. Биыл «Наурызнама» тұжырымдамасы қабылданып, 14 наурыздан 23 наурызға дейін бірқатар шараны өткізу жоспарланып отыр. Бүгін «Амал келді, жыл келді» деген халқымыздың Амал мерекесін тойлап, «баталы құл арымас» деп үлкенге құрмет көрсетіп, батасын алып, кішіге ізет көрсетіп, ілтипатымызды көрсетіп жатырмыз. «Наурызнаманың» әр күні өзіндік ерекшелігімен ерекшеленіп, тақырыптық-мазмұндық сипатқа ие болады. Ұлыстың Ұлы мейрамын бірге атап өтіп, маңызын арттырайық! Баршаңызға дендеріңіге саулық, отбасыларыңызға амандық, еңбектеріңізге толағай табыстар тілеймін! Ұлыс Оң болсын! Жаңа Жыл берекелі болсын! – деген лебізін жолдады.
Одан соң мерекеге жиналған жұрт назарына Амал мерекесіне қатысты театрландырылған көрініс көрсетіліп, ыстық бауырсақ таратылды. Думан күні аудан өнерпаздарының концерттік бағдарламасы көпшілікке көктем әсерін сыйлады. Сондай-ақ мерекеге жиналған жұрт арнайы тігілген шатырда киіз үйде отырып, наурыз-көже мен тағамдардан дәм татты.
Киіз үйге кірген қонақтарды аудан орталығындағы бүлдіршіндердің тәрбиесіне қызмет етіп жүрген балабақша ұжымдары қонақ қылып, өнерлерімен тамсандырды.
Ауылдың ақсақалы, еңбек ардагері Мұқанғали Бектілеуов ақ батасын беріп, ауыл тұрғындарына ырыс пен береке, табыс тіледі. Сонымен қатар мәдениет үйінің фойесінде Казталов ауылдық округі әкімінің аппараты бас болып, Казталов мектеп лицейі, Алма Оразбаева атындағы білім ордасы, аудандық орталықтандырылған кітапханалар жиесі, «Бөкейорда» мемлекеттік табиғи резерваты, ветеринариялық блок ұжымы және Елентай Хайруллин жетекшілік жасайтын «Қуан» шаруа қожалығы ақ дастархан жайса, С.Садықов атында мәдени-демалыс орталығының өнерпаздары әннен шашу шашты.
Нұр Рахман,
Казталов ауданы
zhaikpress.kz
