Казталов ауданының әкімі Асланбек Сарқұлов пен оның орынбасары Рашит Иманғалиев Көктерек, Қарасу, Қараөзен ауылдық округтеріне жұмыс сапарымен барып, бөгеттердің суды өткізуін және көлдіктерге су шығару жұмыстарын бақылады. Кейін, округ орталықтарымен қатар Жұлдыз, Кіші Бостандық, Ащысай, Сатыбалды, Көмекші елді мекендерінде болып, тұрғындармен кездесіп, көлдіктерге су шығару мәселесін талқылады.
Қазіргі уақытта жоғарыдан келген суды тиімді пайдалану мақсатында көлдіктерге су шығару жұмыстары қарқынды жүргізілуде. Мәселен, Қарасу ауылдық округіне су шығару жұмыстарын жүргізу мақсатында «Бестентек» қыстағы маңындағы арық бөгелді. Қараөзен ауылдық округіндегі «Жиеш» және «Ғайса» бөгеттері маңындағы, елді мекеннің қызыл аймағына кіретін көлдіктерге су шығарылды. Аудан басшылары округ әкімдеріне су қоймалары мен бөгеттердің су өткізуін бақылауда ұстауды, көлдіктерге су шығару жұмыстарын тиімді жүргізуді тапсырды.
Айта кетейік, «Қазсушар» РМК БҚОФ-ның техникаларының көмегімен Қараөзен ауылдық округінің көлдіктеріне су өткізетін «Ғайса» бөгетін бөгеу жұмыстары жүргізілді.
Асылбек Нәсіпқали,
Казталов ауданы
