Казталов ауданының әкімі Асланбек Сарқұловтың төрағалығымен аудан әкімінің актив отырысы өтті. Актив отырысына аудан әкімінің орынбасарлары, салалық бөлім, мекеме басшылары, округ әкімдері (онлайн режимде) қатысты.
Активте сөз алып, жылды қорытындылаған аудан басшысы Асланбек Ахметоллаұлы:
– Жаңа жыл — жаңа жоспарлар мен жаңа мүмкіндіктер. Келер жылға үміт артып, ауданымыздың дамуы, халқымыздың әл-ауқатын арттыру бағытындағы жұмыстар жалғасын таппақ. Баршаңызға зор денсаулық, отбасыларыңызға амандық, шаңырақ шаттығын, егеменді елімізді дамыту жолындағы еңбектеріңізге толағай табыстар тілеймін! Жаңа жыл жақсылық әкеліп, молшылық жылы босын! Мереке құтты болсын!, - деген ақжарма тілегін жолдады.
Актив отырысында аудан әкімі Ақпәтер мәдениет үйінің директоры Марат Хасановқа Қазақстан Республикасы Мәдениет және ақпарат министрлігінің «Мәдениет саласының үздігі» төсбелгісін, ауыл шаруашылық саласының ардагері Бахтығали Иманғалиевке облыс әкімінің «Құрмет грамотасын» табыстады.
«Ауыл шаруашылығы қызметкерлерінің салалық кәсіптік одағы» қоғамдық бірлестігінің марапатын Қошанкөл ауылдық округіне қарасты «Тоғжан» шаруа қожалығының жетекшісі Нурлан Тоғжанұлына ІІ дәрежелі «Еңбек даңқы» төс белгісін, Қарасу ауылдық округіне қарасты «Архат» шаруа қожалығының жетекшісі Талғат Нұржановқа «Елеулі еңбегі үшін» медалі, Көктерек ауылдық округіне қарасты «Зай» шаруа қожалығының жетекшісі Талғат Зайұлына «Елеулі еңбегі үшін» медалін табыс етті.
Күн тәртібінде көтерілген 2024 жылы атқарылған жұмыстарды қорытындылау бойынша аудан әкімдігі аппаратының басшысы Нұрсұлтан Каримоллаұлы баяндап, 2024 жылы атқарылған жұмыстар мен жетістіктер легін баяндады.
Активте 2024 жылдың күзгі мерзімді әскери қызметін қорытындылау бойынша аудандық қорғаныс істері бөлімі басшысының орынбасары Әділжан Жәдігеровтің хабарламасы тыңдалды. Казталов ауданының қорғаныс істері жөніндегі бөлім бастығы Б.Баймұхановтың атынан 2024 жылғы 23 желтоқсандағы № 64 бұйрығымен Казталов ауданына берілген жүктемені орындауға және қорғаныс саласына қосып жатқан үлесімен өз жұмысын сапалы атқарып, өзінің лауазымдық міндеттерін үлгілі орындағандары үшін Казталов ауылдық округінің бас маманы Жазира Қойшыбаева «Жыл жаңалығы», Қошанкөл ауылдық округінің Ғ.Бегалиев атындағы жалпы орта білім беретін мектебінің алғашқы әскери және технологиялық дайындық пәнінің ұйымдастырушы-оқытушысы Елжан Қабылтаев «Үздік ұстаз», Казталов ауылдық округінің учаскелік полиция инспекторы полиция майоры Нұркен Калманов «Үздік полиция қызметкері», Казталов аудандық №2 ауруханасының дәрігер маманы, медициналық комиссиясының мүшесі, невропотолог дәрігері Ербол Куккузов «Үздік дәрігер», Ақпәтер ауылдық округінің әкімі Төлеген Сүйінішқалиев «Үздік әкім» аталымдары бойынша марапатталды.
Мейірім Парасат
Казталов ауданы
