Өтіп бара жатқан ұлу жылы Казталов ауданы үшін табыс пен жетістіктерге толы жыл болды. Ауданның әлеуметтік-экономикалық, дамуы айтарлықтай өсіп, спорт, білім, мәдениет саласы зор жетістіктерге жетті. Осының бәрі ауданымыздағы әр салада еңбек етіп жүрген аудан жастарының еселі еңбегі. Осы ретте жыл аяқталар тұста ауданымызда әр салада оза шауып, өз мамандығының хас шеберлерін анықтайтын игі дәстүр қалыптасты.
Туған жеріне, еліне өзіндік қолтаңбасын қалдырып, айырықша үлестерін қосып жүрген жастарды біз мақтанышпен айта аламыз. Олардың бірі ұстаз, дәрігер, талант иесі, кітапханашы, спорт майталманы болса, бірі құқық қорғау, мемлекеттік қызмет саласында, бірі өз кәсібін дөңгелетіп, енді бірі жастар саясатының дамуына белсенділік танытып, айшықты жобалардың басы қасында жүрсе, үздік мекеме ұжымы мен үздік мектеп ұжымы да үздіктер қатарында.
Сенім мен үміт арқалаған Қосөзен жастары бүгінде марапат төрінде. «Жыл үздігі - 2024» жастар премиясына жыл сайын қатысушы үміткерлердің саны артып келеді. Биылғы жылы да жаңадан бірнеше аталымдар қосылып, үздіктер қатары көбеюде. Еліміздің кірпіші болып қаланған бүгін сахнаға шығатын әр жас туған жеріміздің дамуына зор үлестерін қосып жүрген жандар.
Үздіктер премиясында сөз алған аудан әкімінің орынбасары Серік Ерболатұлы;
- Құрметті жастар! Бүгін біз “Жыл үздігі - 2024” жастар сыйлығын табыстау рәсіміне жиналып отырмыз. Бұл кеш жастарымыздың еңбегін, талантын, білімін және ерік-жігерін лайықты бағалап, құрмет көрсететін күн! Елдің болашағы білімді, жігерлі және жаңашыл ойлайтын жастардың қолында. Сіздер тек өз армандарыңызды жүзеге асырып ғана қоймай, туған жеріміздің, ауданымыздың, еліміздің дамуына зор үлес қосып келесіздер! Біз сіздермен мақтанамыз! Сіздердің жаңа белестерді бағындыруларыңызға әрдайым қолдау көрсетуге дайынбыз. “Жыл үздігі” сыйлығы бұл тек марапат ғана емес, жастардың дамуымен, жетістігін мойындаудың жарқын белесі. Бүгінгі жеңімпаздарымыз өз еңбектерімен, табандылығының арқасында биік белестерге жеткен тұлғалар. Олар ауданымыздың мақтанышы, келешекке сенім ұялататын елдің көшбасшылары. Сіздерге Жаңа жылда зор табыс, биік мақсаттарға жету жолында сәттілік тілеймін! Жастарымыз үлкен істердің бастамашысы бола берсін!, -деген тілегін білдіріп, аудан үздіктерін марапаттады.
Қоғам арасында маңдай терімен абыройлы қызмет атқарып, үздіктер қатарынан көрінген жастарымыз қандай құрметке де лайықты
Жұлдыз Асқар
Казталов ауданы
