Кеше «Jastar» спорт кешенінде Жаңақала ауданының қайта құрылғанына 50 жыл толуына орай және белгілі қоғам қайраткері, Жаңақала аудандық партия комитетінің бірінші хатшысы болған Сапаров Сатқали Сапарұлын еске алуға арналған шағын футболдан аудандық ашық турнир өтті.
Жарыстың ашылу салтанатына ақын, аудан әкімінің орынбасары Ақнұрлы Еслямғалиева, ҚР Жазушылар және Журналистер одағының мүшесі Закария Сисенғали, қоғам қайраткерінің ұрпақтары, зиялы қауым өкілдері және жарысты тамашалауға келген көрермен қауым қатысты.
Бұл турнир бірнеше жылдан бері тұрақты түрде өтіп келеді. Биылғысы ауданымыздың қайта құрылғынына да орайлас келіпті.
Аудандық ашық турнирге 13 команда қатысты. Сайдың тасындай мықты спортшылардан құралған командалар бақ сынаған шағын футбол тартысқа толы болып, көрермендерге керемет көңіл-күй сыйлады.
Жарыстың нәтижесінде қарсыластарының бәрінен басым түскен «Petro-Unit» (Орал қаласы) командасы жеңімпаз атанды. Жеңімпаз болып, мойындарына медаль, қолдарына кубок ұстаған спортшы жігіттерге 120 мың теңге сертификат табысталды.
Жүлделі ІІ орын жерлес Жаңақала ауданының командасына (80 мың теңге сертификат) бұйырса, үздік үштікті «Сарыөзен-Бостандық» командасының спортшылары (60 мың теңге сертификат) түйіндеді.
Бекзат Меңдібаев (Бөрлі ауданы) - «Үздік ойыншы» номинациясына ие болса, Ғанимұрат Ғиниматов (Қазталов ауданы) – «Үздік қорғаушы» бағамына лайық деп танылды. «Үздік қақпашы» номинациясы Мейрамбек Жолдығалиевке (Жаңақала ауданы) бұйырды. Үздік шыққан спортшыларға диплом және ақшалай сыйлықтар табысталды.
Оқырмандарымыздың естеріне сала кетейік, бұл жарыс 2013 жылдан бері тұрақты түрде өтіп келеді. Жарыстың бас демеушілері – Сатқали Сапарұлының ұрпақтары.
Еңбегі сіңген, елінің есінде сақталған тұлғаларға арналған осындай турнирлердің берері мол.
Өңірімізде өмірден өткен қаншама белгілі һәм беделді жандар бар. Солардың барлығына арнап жыл сайын спорттық жарыстардан турнирлер өтіп жатса ғажап емес пе? Жазып отырған мақаламыз сондай жандардың ұрпақтарына ой салады деген үміттеміз...
Жанайдар Болатбекұлы,
zhaikpress.kz
