Күн тәртібінде Қоғамдық кеңестің төрағасын сайлау, кеңес ережесін бекіту, кеңес төралқасын сайлау, кеңес мүшелерінің жаңа құрамын таныстыру, 2025 жылға арналған жұмыс жоспары мен комиссиялар құрамын бекіту қарастырылған.
Биыл кеңестің жаңа құрамы БАҚ, спорт, білім салаларының белсенді өкілдерімен толықты. Жаңа құрамда Сырымбек Жапақов, Арман Ысқақов, Берік Ықсанов, Бекжан Неғметов, Гүлзара Төреғалиева, Нұрман Түменов, Меңдіхан Халиханов, Гүлнәр Хайырлиева, Таңат Сәриев бар. Біржан Қайырғалиұлы сөз кезегін Гүлнәр Серікқызына беріп, ол өз кезегінде Қоғамдық кеңестің төрағасы етіп бұған дейін де төраға болып келген Ескендір Елемесовты ұсынды. Кеңес мүшелері бірауыздан қолдап, аудандық Қоғамдық кеңестің төрағасы болып Ескендір Кафарұлы сайланды. Жиынды әрмен қарай Ескендір Елемесов жүргізді. Төраға жаңадан жасақталған Қоғамдық кеңестің ережесін таныстырып, оны кеңес мүшелері бірауыздан бекітті. Сонымен қатар кеңес төралқасы сайланып, 2025 жылға арналған жұмыс жоспары талқыланып, бекітілді. Сондай-ақ Ескендір Кафарұлы Қоғамдық кеңес қызметінің бағыттары бойынша үш комиссияны құруды, олардың құрамын бекітуді ұсынды. Қоғамдық кеңес мүшелері бұл ұсынысты қолдап, нәтижесінде әлеуметтік саланың дамуы мен азаматтардың құқықтарын қорғау жөніндегі комиссия, ауыл шаруашылығы, кәсіпкерлік, құрылыс, тұрғын үй, экология, елді мекендерді абаттандыру және төтенше жағдайлар жөніндегі комиссия, құқық қорғау органдарымен ынтымақтастық және сыбайлас жемқорлыққа қарсы іс-қимыл жөніндегі комиссия құрылып, олардың төрағалары мен орынбасарлары сайланды.
Бұдан кейін аудан әкімінің орынбасары Жаннұр Бекбауұлы Қоғамдық кеңестің төрағасы болып сайланған Ескендір Кафарұлын жаңа қызметімен құттықтап, сәттілік тіледі.
- Бүгінгі күні қоғамдағы өзекті мәселелерді көтеру, олардың шешілуіне атсалысуда Қоғамдық кеңестің орны ерекше. Негізінен, қоғамдық кеңес халықпен жақын болып, билік пен халық арасына көпір орнатып, тұрғындардың пікірлерін билікке жеткізуі керек. Бүгінге дейін сіздер өз тәжірибелеріңіз бен жасап жатқан жұмыстарыңызды көрсетіп, қоғамдағы өткір де өзекті проблемаларды көтеріп келдіңіздер. Сондықтан алдағы уақытта да осы бағыттарыңыздан таймай, белсенді жұмыс жасайды деп сенемін, - деген аудан әкімінің орынбасары қоғамдық кеңестің жаңа құрамын белсенді жұмыс істеуге шақырды. Жиынды кеңес төрағасы қорытындылады.
Гүлзара Мәди,
Жәнібек ауданы,
zhaikpress.kz
