Бүгін Жаңақала ауданына қарасты Көпжасар ауылында 25 қазан – Республика күніне орай ұлттық спорт түріне қызығушылықты арттырып, салауатты өмір салтын насихаттау мақсатында Көпжасар ауылдық округі әкімдігінің қолдауымен, "Jastar" спорт клубының спорт әдіскері Төлепов Бекжанның ұйымдастыруымен көкпардан ауылдық жарыс ұйымдастырылды.
Көкпар ойынының ашылу салтанатында ауылдық округі әкімі Нұрбол Серікұлы құттықтау сөз сөйлеп, ұлттық спортты насихаттаудың маңыздылығына тоқталып, ойынға қатысушы шабандоз жігіттерге сәттілік тілесе, ауыл ақсақалы Аманжан Салауатов ақ батасын берді. Спорттық додада Жаңақала "Jastar" спорт клубының ат спорты нұсқаушысы Жәнібек Уахитов пен Қолқанат Серіков төрелік етті. Жарыс қорытындысында жүлделі ІІІ орынды "Құрдастар" командасы, II орынды "Оқжетпес" командасы, I орынды "Көпжасар" командасы олжалады.
Көпжасардағы ат спортын дамытуға үлестерін қосып, демеушілік танытқан ауылдың атымдай жомарт азаматтарына жас көкпаршылар алғыстарын білдірді. Көптің көңілінен шыққан көкпар жарысы алдағы уақытта өз жалғасын табады деген сенімдеміз.
Айзада Ақбасова,
Жаңақала ауданы
zhaikpress.kz
