Орал қаласында жерлесіміз, спорт ардагері Мирпайз Байдеуовті еске алуға арналған жастар мен жасөспірімдер арасында бокстан ашық қалааралық турнир өтті.
Пятимар ауылында дүниеге келіп, ғұмырының соңына дейін Карманов ЖОББМ-нде ұстаздық қызмет атқарған Мирпайз Әбілхайырұлы спортсүйер талай өреннің қанатын қатайтып, тәлім алған шәкірттері күні бүгінде өз мамандығының мақтанышына айналған. Солардың бірі –Жәңгірхан атындағы Батыс Қазақстан аграрлық техникалық университетінің дене шынықтыру оқытушысы Айдос Есетов пен жеке кәсіпкер Асылан Танзенов ұстаздарының есімін ұлықтап, аталмыш жарысқа демеушілік танытты. 180 спортшы сынға түскен сайыста Қызылоба ауылдық «Qyzyloba boxing» клубының былғары қолғап шеберлері: 46 келі салмақ дәрежесінде Ерген Ғиният ІІІ орынға, 51 келі салмақта Саян Тұрсынғали ІІІ орынға, 71 келі салмақта Мейрамбек Ильдар ІІІ орынға лайық деп танылды. Жүлдегерлердің жетістіктерінің бастауында бапкерлері Бекзат Амангелдіұлының тынымсыз еңбегі мен тәжірибелі маман ретіндегі қолтаңбасы тұрғандығын ескермеске болмас.
Облыс төрінде жеңіс тұғыранан көрінген спортшыларымыз ауданымыздың мерейін тасытып, қоржынымызды тағы бір мәрте жүлдеге толтырды.
Айзада Ақбасова,
Жаңақала ауданы
